Esti miércoles presentóse, na see del Conseyu Regulador (Villaviciosa), la campaña de branu de la Denominación d'Orixe Protexida Sidra d'Asturies. Un añu más, la entidá apostó pola mesma imaxe y eslogan, que'l so oxetivu ye animar, tantu a asturianos como turistes, al consumu d'esti productu ellaboráu con mazana 100% asturiana.

La campaña para la promoción de la DOP Sidra d'Asturies da voz a los protagonistes del mundu rural: los cosecheros. Al traviés la so imaxe, el Conseyu Regulador apela a la responsabilidá del consumidor na so elección de les sidres que demanda, informándo-yos sobro la importancia que pal campu asturiano tien consumir esti tipu de sidra. Pa esti fin, la campaña apuesta por caltener les práctiques culturales acomuñaes a la producción de mazana y al caltenimientu del paisaxe rural.

Luis Arrontes (Arrontes & Barrera), responsable del diseñu, definió esta campaña como “garantía de repercusión”. “La xente fíxolo so. Reflexa perbién l'autenticidá del productu al traviés de el productores y la mazana”, argumentó.

Pela so parte, Pilar de la Cuesta (Impact 5), responsable de promoción en medios, esplicó la fueya de ruta d'esta promoción. “Un añu más, apostemos polos soporte d'esterior (mupis, marquesines, valles publicitaries, etc.) nes principales ciudaes y pueblos. Tamién, vamos faer promoción en radiu, televisión, periódicos y redes sociales. Tou ello hasta'l 30 de setiembre”, concluyó.

El presidente del Conseyu Regulador de la DOP Sidra d'Asturies, Guillermo Guisasola, apeló a la emoción que-y esprende esta campaña. “Siéntome bien arguyosu de que los cosecheros sían los protagonistes. Una vegada más, volvemos pidi-yos a los asturianos que s'alcuerden de nós por que pidan sidra d'Asturies”. Begoña López, directora xeneral de Desenvolvimientu Rural ya Industries Agraries, calificó con “un diez” la campaña y deseya que “la mazana siga faciéndose escuchar”, porque, al so xuiciu, representa “emotividá, tradición y futuru d'Asturies”. “Dende'l Gobiernu vamos siguir sofitando”, concluyó.