El Conceyu de Cangas, al traviés de la conceyalía de Cultura, preparó una amplia programación d'actividaes de la so Navidá Cultural 2022’, dirixida a los más pequenos de la casa. Como si un calendariu d'advientu tratárase, casi a diariu, programáronse actividaes infantiles, que se van desenvolver a les 17 hores na carpa instalada na plaza de la Oliva, ente'l 24 d'avientu y el 5 de xineru. “Ye xuna programación bien amplia, que busca sobremanera entretener y faer esfrutar a los neños y neñes nestes fiestes tan especiales”, dixo José María Álvarez Carro, conceyal de Cultura de Cangas.
La Navidá Cultural 2022’ va arrincar de manera oficial cola recepción de Pá Noel, quien va visitar Cangas, por que los más pequenos puedan faer los sos pidimientos d'última hora'l día 24 d'avientu, cuando tamién va tener llugar un taller d'ellaboración d'adornos navidiegos con madera. El día de Navidá los neños y neñes van poder esfrutar d'esti día con una fiesta d'enchibles, que tamién se celebrará'l día 31 d'avientu pa despidir l'añu con muncha enerxía y sobremanera con muncha felicidá.
El 26 d'avientu los neños y neñes de Cangas van aprender a ellaborar calcetos navidiegos, que van decorar los árboles y les chimenees de les cases, pa que puedan enllenase de dulces y munchos regalos mientres estes fiestes. Los díes 27, 28, 29 d'avientu y 3 de xineru la programación treslládase al teatru Toreno, onde va ser necesariu realizar una inscripción previa na Casa de Cultura ‘Palacio de Omaña’, p'asistir. L'espectáculu de maxa ‘Érase una vegada… una ilusión’, va ser l'encargáu d'abrir esta programación familiar nel teatru Toreno, que va siguir el 28 d'avientu poniendo sobre les tables ‘Pinocho’ de Mar Coloráu Teatru. El día 29 los más pequenos y les sos families van poder esfrutar de l'actuación musical d'Arca Mozart ‘Les Aventures de Torpecillo y Remangu’ y el 3 de xineru'l payasu Smile de Carmela Producciones, va enllenar de risaes les butaques pa empezar l'añu con bona enerxía.
Los más mozos van poder celebrar la so particular despidida del añu con una fiesta de Nueche Vieya Infantil, que se va celebrar el 30 d'avientu. El nuevu añu va estrenase'l 2 de xineru con un taller d'ellaboración de mandiles navidiegos infantiles y el 4 de xineru los neños y neñes van poder participar nun taller de lápices navidiegos. Ensin dulda, el día grande d'estes feches, va ser pa los neños y neñes el 5 de xineru, cuando les sos maxestaes Melchor, Gaspar y Baltasar, van llegar a Cangas acompañaos pol príncipe Aliatar pa participar na tradicional Cabalgata de Reyes y darréu visitar les cases de tolos neños del conceyu.
