San Valentín y el Día del Padre son… hermanos. Ñacieron del mesmu padre: un asturianu pernomáu que, al acabar la posguerra, atopó en dambes feches una oportunidá de engrandecer el so negociu.

Foi a finales de los años 40. Si en 1948 Galerías Preciados publicaba'l primer anunciu na prensa española encamentando a agasayar con regalos al ser amáu, tamién esi añu ‘Nely’ Vicente, coles mesmes profesora del colexu Santu Ánxel de Vallecas, entamó un homenaxe a los padres de los sos alumnos faciéndolo coincidir col día nel que se festexaba al padre por escelencia: San José, el de Xesucristo (anque putativu). Yá se cellebraba, daquella, el Día de la Madre, y agora la maestra daba-y a los neños la oportunidá d'ufierta-y un regalu al so proxenitor.

D'aquella pequena iniciativa local, casi aneudótica, fadría un emporiu Pepín Fernández, moscón al mandu de les populares Galerías Preciados, en Madrid. Seis años más tarde, y de la mano d'El Corte Inglés, dirixíu pol tamién asturianu Ramón Areces, dambos negocios llanzaron el primer Día del Padre que tuvo efectos a nivel nacional. Usaron el mesmu día qu'aquella maestra madrilana y que yá tímidamente, de magar, empezaren a espublizar dellos pequenos negocios de Madrid. Socialmente, la iniciativa, fecha a golpe d'anunciu nel ABC y por mediu de la cartelería asitiada nes más céntriques cais madrilanes, foi tou un ésitu; per parte de les mentes pensantes, non tantu. ¿Mercar un regalu a el proxenitores en tiempos nos que solo'l pá llevaba'l dineru a casa según el modelu de la familia más tradicional?

“Magar que nós, los padres, síamos depués los beneficiarios del tirante o'l calcetu, de la corbata tresnochada o de los zapatos tuertos, a última hora, vamos ser nós quien lo vamos pagar tou, colo que'l beneficiu nun paez per parte dalguna”, dicía'l periódicu xixonés ‘Voluntad’ en 1954, cuando yá taba claro que la fiesta llegara pa quedase: tolos negocios, equí y acullá, secundáranla. ¿Pensaben ustedes que quiciabes sería más antigua l'asociación del 19 de marzu colos cartones de tabacu, les maquinillas d'afeitar o los xerséis al pá? ¡Eso ye que nun conocíen ustedes lo convincente que yera'l bon Pepín Fernández!