¿Qué deportes rellacionaríes con Asturies? Seguro que la to respuesta a esta entruga de primeres seríen deportes como'l fútbol, el ciclismu, el piragüismu, ya inclusive nos últimos años, la Fórmula1 por causa de Fernando Alonso. Sicasí, hai una deporte bien rellacionáu con Asturies qu'anque pocu popular, tien unos raigaños bien fuertes nel nuesu país: la llucha baltu.
Ye probable que poca xente oyera falar d'esta veriedá de llucha, pero ye tradicional n'Asturies y el norte de Llión. Tratase d'una modalidá con dellos sieglos d'antigüedá: yá nos sieglos XI y XII representábase nos capiteles romanos. Solía practicase en dómines de descansu y fiestes. Yera sobretou típicu mientres les mazcaraes y los guirrios pa poner a prueba l'axilidá y la fuerza de los mozos. Xunto a estos xuegos solíen practicar otros como'l tiru’l palu, el tiru cuerda o los pulsos.
La llucha baltu consiste en “voltiar” al contrariu al suelu sobro'l llombu (d'ende ye probable que venga'l nome de “baltu”). Según les sos regles, el lluchador o lluchadora tien que consiguir que'l llombu del so contrariu toque'l suelu. El lluchador o lluchadora va valise de la so fuerza y, más importante entá, de la so axilidá físico y mental pa “voltiar” al contrariu. Un valtu ye un puntu, mientres que medio valtu sedríen 0.5.
Esisten dos categoríes de "llucha baltu"
Llucha cuerpu a cuerpu: Enllacense parando'l brazu derechu percima del homru esquierdu del rival y el brazu esquierdu per debaxo de la axila derecha del rival, xuniendo les manos.
Llucha a petrina: Garren la petrina del rival pol estómagu cola manzorga y pasando'l brazu derechu sobro'l costazu esquierdu del rival, garren la petrina d'esti pel costazu cola mano derecha.
Anguaño, la Lliga Celta d'Asturies tien un proyeutu de recuperanza del baltu qu'unvieron al Conseyu Internacional de Lluches Celtes qu'aconceyó en Helsinki con mui bona acoyía. Tamién collabora cola recuperación del baltu la Federeación de Llucha Asturiana. Ensin escaecenos de delles demostraciones públiques de la llucha baltu realizaes pola Lliga Celta d’Asturies, ente les que destaca la del Festival Intercélticu d’Avilés y Comarca, nel que s'axuntaron alredor de 500 persones que pudieron esfrutar d'una exhibición d'esta tradicional llucha. Amás, podemos atopar dalgún ximnasiu de Xixón onde s'enseña esta disciplina. Si t'interesa deprender más de la llucha baltu non dexes de visitar esti blog de la Lliga Celta d'Asturies onde cuenta más detalladamente les regles y disciplines.
