María Cotiello Pérez, ye una actriz asturiana de cine, teatru y televisión nacida en Mieres nel añu 1982.
L'asturiana vivió na so localidá natal hasta l'añu 2000, cuando se treslladó a Madrid pa formase empezando a estudiar na Real Escuela Superior de Arte Dramático. La so primer participación nuna obra teatral foi en «Cuentacuentos» nel añu 1999 con namás que 16 años. A partir d'ende, empecipió la so carrera profesional participando n'otres obres como «Presas» o «La Danza de la Muerte«.
Tamién en Madrid, ciudá na que mora anguaño por motivos llaborales, empezó a formar parte de distintes series de televisión. Exemplu d'elles son «Amar en tiempos revueltos» en TVE, «Los Protegidos» o «Bajo Sospecha» , dambes n'Antena 3. Un de los sos trabayos más conocíos ye'l so papel na película «Las 13 rosas" que recibió cuatro Premios Goya nel añu 2008.
Anque gran parte de la so vida tuviera morando na capital, María Cotiello siempres tuvo bien presente la so tierra natal. Ye por ello qu'en 2009 xuntose a la campaña «Doi la Cara» del Conceyu Abiertu pola Oficilidá (CAO) y siete años dempués estableció un contratu cola Televisión del Principáu d'Asturies. Nesta cadena, presentó'l programa «De Cai» nel que selmanalmente dábanse a conocer les ciudaes d'Asturies cai a cai.
Un de los sos trabayos más recién ye «Seis hermanas» una serie emitida en TVE ente los años 2015 y 2017. Nesi mesmu añu, 2015, foi reconocida col galardón Mierense del Mundu como reconocimientu a la so trayectoria.
