Esti próximu xueves 16 d'avientu, nel Llar La Llegra d'Uviéu, vas poder esfrutar d'un audiovisual y una charra alredor de los mazcaritos d'Uviéu, one vas poder averate pa conocer la hestoria d'estos singulares personaxes.
Mazcaritos d’Uviéu ye una asociación cultural que trabaya pola recuperación del antroxu tradicional nel conceyu d’Uviéu, una mazcarada urbana pintada por Evaristo Valle (1928) asemeyada a otres mazcaraes d’iviernu n’Asturies. La investigación hestórica remite a les carroces y moxigangues del Corpus del sieglu XVII, al antroxu popular y carnaval burgués del XIX, a les prohibiciones franquistes del XX que tovieron a piques de facelu desapaecer. Los Mazcaritos entamaron a correr l’antroxu a la manera tradicional en 2017 pel barriu Antiguo, participando nos Alcuentros de Mazcaraes d’Iviernu de Valdesoto y nel Festival de Máscara Ibérica de Lisboa (2017,2018 y 2019). La presentación del artista Ánxel Nava, cabezaleru del coleutivu y autor de la investigación, acompáñase con música de zanfona (Celia González Baschwitz) y personaxes antroxando. Una xornada divulgativa y prestosa nel Llar La Llegra.
