Samartín de Lluiña ta de celebración otra vuelta y, esta vegada, fai alcordanza y reivindica los sos raigaños. Como yá ye tradición na parroquia de Cuideiru, mientres los díes 3 y 4 d’agostu, el pueblu va facer alcordanza de la so hestoria per aciu d’un mercáu d’artesanía que vien acompañáu d’un programa d’actividaes bayurosu.
D’esta manera, l’eventu va empecipiar el día 3 a les 8:30 de la mañana cola IX Ruta Vaqueira entamada pol grupu La Chiruca y que va percorrer les brañes vaqueires del conceyu tres la charra sobre los vaqueiros d’alzada que va dar l’historiador y comunicador Raúl Alonso. Tres d’ello, a les 12:00, va inaugurase oficialmente’l XXII Mercáu Vaqueiru cola charra de Marta F. Vilar, musicóloga de la Universidá d’Uviéu sobre’l repertoriu musical vaqueiru anguaño. Yá pela tarde, va ser el turnu de l’asociación 6 Conceyos, encargaos de celebrar xuegos tradicionales asturianos na plaza de la ilesia. El mercáu va siguir abiertu hasta les 22:00 hores.
Al otru día, va abrir les sos puertes a les 12:00 y namás media hora depués va llegar la tradicional concentración de Seat 600 Asturies. Yá en sesión vespertina, l’Asociación Etnofolclórica L’Esperteyu de L’Entregu (Samartín del Rei Aurelio) va amosar el baille tradicional del país y dende les 18:00 hores Alba Menéndez, integrante del grupu 6 Riales, va ponenos a cantar y baillar.
Amás, mientres tola fin de selmana va haber nel Mercáu Vaqueiru, que ye Fiesta d’Interés Turísticu, exhibición de gües y artesanos, hinchables pa la reciella, cantares de chigre y muncho más.
