Mieres acueye'l 21 de setiembre “Muyeres on*Bike”, una actividá pa les muyeres, con un percorríu non competitivu de 34 quilómetros col que pretende promovese l'esfrute del deporte nuna xornada d'alcuentru y ociu y promocionar los recursos naturales del conceyu avanzando nel impulsu al cicloturismu y el BTT nel territoriu. La cita, entamada por Desafíu Carbón cola collaboración del Conceyu de Mieres, va tener la so salida'l 21 de setiembre a les 9.30 hores del Parque Aníbal Vázquez, dende onde va arrancar un percorríu de 34 quilómetros con 1.400 metros de desnivel pela zona del Picu Llosorio. Una actividá abierta a toes y que tien como oxetivu fomentar la figura de la muyer nel deporte nuna xornada non competitiva, polo que s'anima a toes a participar yá que se trata d'un día pa esfrutar de la bici nuna redolada de lluxu. Les inscripciones pa “Muyeres on Bike” yá tán abiertes na páxina web.
Les deportistes Rosa Fernández y Rocío Gamonal participaron nel Conceyu de Mieres na presentación d'esta actividá, na que tamién tuvieron la vicealcaldesa, Teresa Iglesias, los conceyales de Turismu y Deportes, Álvaro González y César Menéndez, la conceyala de Mediu Ambiente, Nuria Ordóñez, y Covi Juez, del club ciclista Bellastures. Toes y toos animaron a la participación nesta cita deportiva qu'arranca nesti 2024 con esta primer edición que, amás, enmárcase na Selmana de la Movilidá, que'l so programa completu d'actividaes va presentase llueu, pero que, según adelantró la conceyala de Mediu Ambiente, esi mesmu día 21 de setiembre va tener una cita que complementa a esti “Muyeres on Bike”.
Trátase d'una bicicletada solidaria pel cascu urbanu abierta a tola ciudadanía (reciella, persones adultes…) y l'oxetivu ye que dambes cites deportives rematen coles mesmes nel Parque Aníbal Vázquez pa poner el broche d'oru a una xornada de fomentu del deporte femenín, solidaridá, alcuentru y esfrute.