Mio güela, una sección na que diverses persones falen de les sos güeles.

Mio güela Nedi yera una muyer fuerte a la que conocí nos sos años más débiles, pero que siguía teniendo’l puxu d’una personalidá de fierro. Cola mocedá tarazada pola Guerra Civil, ente’l so Xixón natal y el Llastres familiar, recordaba de forma viviega los bombardeos de la ciudá. Yera una muyer fondamente marcada nos sos vezos pola posguerra, como toa una xeneración. “¡Forra con pan!”, dicíame cuando de neñu yera ruin y nun acompañaba con ello les comíes. En casa, mio pá siempres cuenta que yera vezu, tovía nos años setenta, entamar la comida col pan duro del día anterior, pa poder acceder a la barra del día. Nada podía desaprovechase en casa.

Nedi estudiara na Escuela Comerciu de Xixón hasta la Guerra y dempués asumió’l papel que’l réxime acutaba pa les muyeres, xestionando la casa con un control total sobre les cuentes, que tenía fama de xestionar perbién, pues pagó la hipoteca enantes de terminar el plazu marcáu. Ser una muyer fuerte nun impidía que fuera sensible enforma. Recuérdase na familia como al cambiar de casa y cuando diben a firmar la compra’l pisu nuevu, la nueche anterior, ella taba llorando. Mio güelu Poldo entrugó-y qué-y pasaba. El cementeriu del Sucu víase per una ventana. Nun mercaron aquel pisu a la fin. 

Conociera a mio güelu Poldo, y anque los dos vivíen en Xixón, nel Llastres familiar de los dos, nuna fiesta de San Roque y al llau del xiblíu de la quema del Xigante. Nedi tenía fama de ser mui estricta nel cortexu y de que llantaba dalguna qu’otra gofetada a los llastrinos que s’arimaben más de la cuenta baillando. 

Conocida pola so sinceridá aplastante, nun fuxía del conflictu o la discusión si de dicir la verdá se trataba. El so temperamentu facía que fuera habitual n’ella la espresión “¡Chinflos de gaita!”, cuando se-y llevaba la contraría o nun se-y facía casu. Lo que más-y prestaba yera facer traxer pa les moñeques barriguitas y texía unes mantes perguapes. Pel branu diba a la playa San Llorienzo, onde compartía caseta con otres familiaries.

Nos últimos años la enfermedá foi impidiéndo-y dir a la caseta, facer vida normal, la movilidá y hasta la capacidá de falar, que foi perdiendo hasta la totalidá mientres s’engurriaba y se diba apagando. Nos últimos meses de la so vida, cuando yá nun yera a articular pallabra, mio pá, que s’iniciaba entós nel mundu de la cocina, preparó en casa de mios güelos una merluza al fornu con desastrosu resultáu. Anque-y costaba abondo sacar una sola pallabra, cuando mio pá-y entrugó qué-y paecía la merluza. Sacó fuercies pa dicir les que depués sedríen les últimes pallabres que pudo pronunciar: “Esto ye comida de gochos”. La risotiada foi xeneral y ella sorrió. Tovía ye un recuerdu guapu que resona cuando-y sal mal un platu a mio pá, y que nos fai recordar a mio güela y el so carácter. ¡Cuánto la echamos en falta! 

Inaciu Galán