Nos años 90, falar del tiempu yera falar, xeneralmente, d'homes. Yeren ellos siempres los que s'encargaben de falanos d'isobares, nubarrones y más xíriga meteorolóxica que munchos nin entendíamos y llindábamonos a mirar a cencielles el dubuxín del mapa (entá nun s'estilaba eso mandame semeyes al del tiempu). Ente esos nomes destacó sobremanera el d'una muyer uvieina: Minerva Piquero. Y non yá porque fuera la primer muyer en dar el tiempu nes televisiones estatales, sinón tamién pol so estilu propiu a la de dalo. Y ye qu'un espaciu que solía cargase de palabres rimbombantes y paisanos serios, ella dio-y color con una sorrisa y una forma d'esplicar muncho más cercana a los espectadores. Según confesaba ella mesma en dalguna entrevista «Esa necesidá d'esplicalo pa que yo lo entendiese foi lo que lo fizo diferente«.

Esi estilu distintu y especial, fixo que se convirtiera nun de les cares "propies» de la cadena, na que trabayaba dende los sos entamos. Prueba d'ello fueron les distintes «promos» de la canal, collaboraciones n'espacios d'ésitu como Farmacia de Guardia, Lluvia de estrellas o La Clave ya inclusive les primeres campanaes d'Antena 3 (en nuechevieya del añu 1990/1991).

Siguió n'Antena 3 hasta l'añu 2004, cuando TVE cunta con ella pa copresentar xunto con Jose María Iñigo y el cómicu Don Mauro el programa Carta de ajuste, no que diba ser pa ella un cambéu de rexistru radical que, según comentaba en dalguna entrevista d'entós daquella, llevaba tiempu buscando. Sicasí, l'espaciu nun funcionó bien d'audiencia y foi atayáu tres namás que trece programes d'emisión, como tampoco llegó a calar el programa de variedaes Sábado, que malapenes llegó a durar un par de capítulos.

Tres estos programes, la uvieín caltuvo dellos años alloñada de les cámares, volviendo en momentos puntuales pa entevistes y collaboraciones, amás de presentar dalgún programa en cadenes locales.

Sicasí, Minerva Piquero collechó ésitos n'otros campos: na actualidá ye directora de comunicación y RRPP en centros de medios dentsu España y cofundadora de l'axencia de comunicación GetArs, onde desenvolvió numberosos proyectos de publicidá y marketing BTL. Amás d'esto, apocayá estrenóse tamién como escritora llanzando la novela erótica Nacida Libre.