Un añu más, el conceyu de Morcín celebra la nuesa rica gastronomía asturiana cola celebración de dos certames al rodiu de dos de los productos más demandaos tanto polos asturianos como polos turistes: les casadielles y el quesu Afuega’l Pitu. En VerAsturies queremos convidavos a visitalos.

XII Edición del Concurso Mundial de Casadielles
Entamáu pola Hermandá de la Probe, de La Foz de Morcín, cola collaboración y l'asesoramientu del Gremiu d'Artesanos Confiteros del Principau d’Asturies, convócase la XII edición del Concursu Mundial de Casadielles. Los y les participantes nesti certame, d'accesu llibre y gratuitu previa inscripción, van apurrir al xuráu seis casadielles pa deliberar cuál ye la meyor. Esisten trés categoríes: Casera, profesional y escueles. Apúrrense cuatro premios, una por categoría, más el premiu a la meyor casadiella de Morcín. ¿Inda nun tienes fame de casadiella? ¡Cuerre y visita esti concursu!

Si namás cola gastronomía nun te sirve… tamién vas poder ver un elementu tradicional d'Asturies, como ye la puya’l ramu, que se realiza enantes de conocer el veredictu del xuráu.

XL Certamen del queso Afuega’l Pitu
En Morcín nun aparen de programar actividaes y ye que, pocos díes dempués de les casadielles, tenemos el XL Certame del quesu Afuega’l Pitu, onde se va a escoyer a los meyores quesos nes categoríes ‘Roxu de trapu’, ‘Blancu de trapu’, ‘Atroncáu roxu’ y ‘Atroncáu blancu’. Nel intre del certame, tamién se va apurrir el galardón Queseru mayor d'Asturies al cocineru José Antonio Campoviejo. Trátase d'un eventu que se recupera dempués del parón obligáu pola pandemia, polo que los paladares más esquisitos van querer saciase d'esti manxar asturianu. Y nun t'esmolezas, porque si t'esmolez la to forma física… esti mesmu día celébrase, en collaboración col Ayuntamientu, el X Trail Afuega’l Pitu. ¡Nun tienes escusa!