El Muséu de la Sidra de Nava tien como oxetivu dar a conocer y promocionar la bébora asturiana
Nun se sabe a ciencia cierta dende cuándo se consume sidra n'Asturies. Dellos estudiosos de la materia espliquen qu'hai evidencies qu'apuntaríen al consumu d'esta bébora yá en tiempos d'Estrabón. El xeógrafu ya hestoriador griegu refirióse en dalgunos de los sos testos a la escasez de vinu nel país unos sesenta años enantes de Cristu. De lo que sí hai certidume ye de la ellaboración de sidra allá pela Edá Media, época de la que se tienen numberosos testimonios que falen de la importantes presencia de pumares y sidra nel territoriu asturianu. Más allá del cuándo escomencipió, lo cierto ye qu'esta bébora alcohólica de baxa graduación ye sinónimu d'Asturies.
El Muséu de la Sidra d'Asturies, allugáu en Nava, tien como oxetivu dar a conocer y promocionar la bébora asturiana. Pa ello, la instalación plantega un percorríu pel ciclu d'ellaboración de la sidra, dende la polinización de los pumares hasta l'embotelláu, pasando pel prensáu y el pasu pel tonel pa formentar. La visita al muséu, inauguráu en 1996, entama con un truébanu en plena actividá.
Les abeyes son responsables de la polinización de los pumares. Nesti puntu, repásense les numberoses varidaes de mazana asturiana emplegaes pa facer sidra, 76 dientro de la DOP. El siguiente pasu ye, propiamente, el procesu pa sacar el xugu de les mazanes, el mayáu. L'equipamientu cunta con ferramientes y máquines de distintes dómines que facilitaben el trabayu de los llagareros. Ente elles, destaca una máquina que con namás una mazana amuesa tol procesu que tien llugar hasta que pinga del llagar la sidra del duernu.
El muséu tampoco nun escaez la cultura qu'a lo llargo de los sieglos foi creándose alredor del consumu de sidra. Una cultura única nel mundu y que tien el so epicentru nel ambiente de chigres o sidreríes. L'espaciu recrea una d’elles, coles tradicionales botelles, los vasos de cristal fino y una descorchadora, l'aparatu conocíu como "chigre", que-y acabó dando nome a los propios establecimientos. La colección del muséu tamién cunta con un conxuntu d'elementos gráficos y documentales del sieglu XX rellacionaos cola sidra, ente los que destaca una colección d'etiquetes de sidra axampanao.
El Muséu de la Sidra d'Asturies abre les sos puertes tolos díes, sacante'l llunes, n'horariu de mañana y tarde. El preciu de la entrada p’adultos ye de 4 euros, de 3 euros pa mocedá ente 6 y 16 años y 2 euros pa menores ente 3 y 5 años. Los menores de 3 años entren de baldre. Tamién hai disponibles tarifes especiales pa grupos. Amás, quien quiera saca-y el máximu provechu a la visita tien la posibilidá de contratar visites combinaes coles qu’esfrutar de la entrada estándar al Muséu y la visita a un llagar navetu en serviciu.
