Ensin dulda una de les construcciones más característiques que podemos atopar n’Asturies son los horros, que dibuxen los paisaxes asturianos y despierten la curiosidá de tolos que nos visiten. ¿Pero qué hai davezu tres d’estes construcciones?
D’antiguo, l’horru yera un elementu imprescindible nes cases, polo que cuasi toles cases teníen ún pal so usu. Anque tamién ye verdá que n’ocasiones dalgún horru dividíase ente delles families, de manera qu’un horru podía usase ente más d’una familia. Yera tan importante que la xente de pueblu preguntábense cómo yera que podíen vivir ensin horru na ciudá.
Los horros usabense pa xeres agrícolas y ganaderes, y d’ellos colgábense riestres de panoyes y guardábense les fabes, patates, cebolles, frutos y otru tipu d’alimentos. Al tar colgaos no alto, aislláu del suelu, l’alimentu conservase seco y la comida tarda más n’empodrecer. Amás, tando arriba, puede protexese de que la coman ratos y otros roedores.
Xeneralmente, los horros tán compuestos por pegollos, columnas pirapidales o cóniques de madera, de piedra o de mampostería. Un pilpayu o solera sobre el que s’afita’l pegollu. La muela, pegollera o tornarratos, una pieza cuadrada o circular, que ye lo que nun dexa que suban los ratos (yera importante nun posar un palu o dalgo n’ellos que-yos ayude a subir hacia la comida) y dalgunes vegaes tamién teníen tornagües, unes tables que defienden l’horru cuando l’agua bastia. L’horru ta fechu namás de madera, menos el pilpayu, la muela y el teyáu.
Como datu interesante, hai vegaes que podemos atopar inscripciones nos horros, como’l nome del so amu, o dalguna frase dedicada a dios o a la virxe, escrites pa pidi-yos que protexa la cosecha.
