N’Ingalaterra esiste la figura del Derby Tup, que representa una cabra o carneru encapucháu, y participa ente grupos d’adultos, o de la reciella, cantando los aguilandos nel Nadal de Derbyshire y Sheffield. Estes celebraciones conócense como mummers, na que participen tamién, por exemplu, un Vieyu, o una Vieya cola so escoba, diaños, etc.

Conócense datos de la so presencia ya en 1845 como’l Tup de Derby/carneru de Derby, el Vieyu Tup/carneru, qu’aparez en grupos d’aguilanderos nes feches de Nadal, Nuechivieya y Añu Nuevu. Podía usase una cabeza real de cabra o carneru, o una talla de maera.

El vocablu tup, n’Inglés, da nome a los carneros, machos cabríos, que nes creencies d’antigües civilizaciones y de cultures populares amás de ser divinidaes, son símbolos de fertilidá, xunto a les cabres, sobre too n’aquellos llugares onde, por diferentes motivos, non se podíen tener toros y vaques, sustituyendo unos a otros simbólicamente según los territorios, polo que nun ye d’estrañar la representación nesti sen de cabrones y cabres, toros y vaques, nes mascaraes d’inviernu, tan relacionaes colo “pagano” y la fertilidá venidera.

Asina mesmo, los ciervos venceyáronse al círculu de muerte y vida, pol so ciclu de renovación de la cornamenta, y nel antiguu cristianismu enartiábase esti animal a Xesucristu pola so muerte y resurrección, el ciclu solar, y pola tradición, ya afitada por Plinio na so Hestoria natural, de que se creía que los ciervos podíen acabar con facilidá coles culiebres, la maldá, la tentación según el cristianismu, y rexuvenecer con ello.

Ye realmente ablucante alcontrase con representaciones de mascaraes y aguilandos en manuscritos medievales nos que vense dances y los ámbitos musicales nos que participen ciervos o cabres, coneyos, otros animales, y, seguramente, la Vieya, demostrando’l puxu de les tradiciones populares a pesar del pasu’l tiempu y les dificultades acaecíes, coles prohibiciones de la Ilesia, siempre xixilante.

Nun ye d’estrañar entós la presencia d’estos animales nes actuales mascaraes como animales totémicos, fertilizadores, maternales, anunciadores de cambios, etc.., que son un continuu de tradiciones mui antigües que se mantienen vives gracies a les cultures populares, coles sos diversidaes y adaptaciones, a pesar de les prohibiciones y persecuciones seculares de la Ilesia católica y d’otros poderes.