La esposición “Pirates. Los lladrones del Mar” ta acabante d’inaugurase nel Palaciu de Revillaxixéu de Xixón. Esta esposición indaga na hestoria de la piratería, faciendo analís de les sos principales etapes y les sos maneres de vida, oxetivos, vezos y costumes d’unos personaxes que yá son llexendarios gracies a les sos hestories na lliteratura y nel cine.
La piratería, venceyada dende los anicios a la hestoria de la navegación, ye un fenómenu qu’afonda los sos raigaños nel entamu de la civilización y que llega hasta los nuestros díes. N’esencia, trátase d’una serie d’actos cometíos na mar y que son asemeyaos a los que na tierra se definen como pillaxe o robu. Si los faen los que s’amparen nel derechu de represalia, debe falase de corso. Esta actividá ye una forma de guerra con autorización otorgada pol poder al traviés de la “patente de corso”, que permitía perseguir buques enemigos y facese coles riqueces que tresportaben.
La piratería y el corsarismu foron actividaes comunes en cualesquier mar onde se diera un tráficu marítimu importante. Sicasí, anque l’actividá nun varió a lo llargo de la hestoria, sí lo ficieron los métodos, armes, implicaciones socioeconómicos ya inclusive la consideración moral del pirata.
La esposición presenta dos etapes diferenciaes de la hestoria de la piratería: la primer, dende los oríxenes del comerciu hasta’l sieglu XIV; la segunda (la nomada “edá d’oru), ente los sieglos XV y XVIII. Un percorríu hestóricu que nos lleva dende’l mar Mediterráneu, onde la piratería apaez nel mundu clásicu, hasta los mares de Filipinas ya Indonesia, el Norte d’África, el Caribe...
Puede visitase dende’l 3 d’avientu hasta’l 6 de marzu de 2022 nel Palaciu de Revillaxixéu, sacantesel 25 d’avientu, por mor de la celebración navidiega.
