Playpresta va estrenar esti llunes 18 de xunetu una nueva sitcom que va poder vese online en toles sos plataformes: Instagram, Youtube y Facebook. La serie, de producción 100% asturiana, ta protagonizada por Aitor Riera (Viescollacios) y Marina García (La caxa de Pandora), y ta escrita y dirixida pol guionista maliayu Marcos S. L. (Bertucu Show, Proyectu Webserie). La serie va soltase nes sos redes tolos llunes del branu a partir de güei 18 de xunetu a les 21:00. Nun ye la primer vegada que Marcos S. L. y Playpresta somorguien nel mundu de la ficción. Yá tienen realizaos xuntos programes d’esti xéneru como Bertucu Show o Proyectu Webserieque foi la primer webserie “coral” grabada dafechu n’asturianu, con un ésitu de recepción y crítica.

El Pisu cunta les aventures y desventures de Marina y Aitor, dos mozos qu’acaben d’emancipase y vense obligaos a convivir nun pisu d’un barriu de Xixón. “La idea xurdió nuna conversación na oficina - cunta’l guionista Marcos S. L. - Yá tenemos una edá, y na nuesa xeneración tol mundu vivió delles coses compartiendo pisu que pensamos que podía dar pa una serie. Lo guapo ye que nun hai un argumentu fixu, sinón anécdotes esaxeraes a lo absurdo pa que la xente eche unes buenes rises”. Marina García y Aitor Riera, collaboradores habituales de Playpresta, fueron los encargaos de dar vida a esos personaxes colos que comparten nome. Y algún, hasta dalgo más: “Mólame’l mio personaxe porque ye una caricatura de la mio personalidá - confiesa Aitor -: fatu bien, despistáu, amante de la fauna y flora, cómicu, guetador d’ayalgues… difícil d’aguantar dalgunes vegaes. Prestóme a esgaya”. Marina, per otru lláu, foi’l so contraparte ideal: “La Marina de la serie ye una moza algo repunantuca... Bastante más seria que Aitor. El contrapuntu necesariu pa enxamás nun aburrise en El Pisu. Na serie nun lu aguanta, pero na vida real téngo-y ciñu”.

Playpresta sigue asina medrando’l so conteníu online n’asturianu. Un conteníu que lleva yá creando mientres cuasi cinco años ensin parar. El Pisu xúnese a la oferta de la canal, xunto a otres ofertes d’esti branu como Viaxando, Falar d’equí, La Xanzana (otru estrenu braniegu onde vamos esfrutar de covers folk interpretaos por Daniela Cortina) y dalguna emisión en directu pola so canal de Twitch.