El conceyu de Proaza namora cola so mezcla de naturaleza xabaz y cultura tradicional. Abrazáu por montañes, ye conocíu pola Sienda del Osu, ruta cicloturista y senderista que percuerre antiguos trazaos mineros. La so capital, la villa de Proaza, caltien casones solariegues, una torre medieval y l'ambiente afayadizu de los pueblos asturianos. Ente miradores, brañes y montes, el visitante afaya paisaxes onde entá habiten osos pardos en semillibertá. Gastronomía casera, hospitalidá sincera y un ritmu de vida tranquila faen de Proaza un destín que convida a quedase, a lo menos un día con una visita a estos trés llugares:
Banduxu
Davezu atopamos llistes interminables de coses o destinos a los que dir siquier una vegada na vida. Banduxu ye una d'eses estampes que non te van dexar indiferente, a la que vas querer volver y onde vas notar que se detien el tiempu.
Esta aldea d'apenes 40 habitantes, merez toos estos afalagos y munchos más pola so arquitectura medieval perfectamente cuidada, unes fascinantes vistes y un paisaxe que creció ente llonxeves tradiciones. Banduxu alzase na zona central d'Asturies, dende lo alto de les montes que lu arrodien conxugase col verdor de la so naturaleza en perfecta sintonía. L'aldea de Banduxu estremase en siete barrios qu'encarnen como nengún otru sitiu la cultura medieval: La Reguera, La Molina, Palaciu, Toral, El Barreiru, Antelaiglesias y Campal.
Ensin dulda, esta aldea que paez detenida nel tiempu, ye ideal para desconectar del nuesu día ente día pa conectar con nós mesmos. Un llugar onde naturaleza, silenciu y hestoria son los protagonistes. Banduxu ye un cachu de maxa nel nuesu Paraísu Natural. Merez la pena descubrilo. Siquier, una vegada na vida.
La torre medieval de Proaza
La torre medieval de Proaza, tamién llamada Torre del Campu o Torre de los González-Tuñón, ye una construcción de calter defensivu que s'alza pela rodiada del cascu urbanu de Proaza, n'Asturies, frente al antiguu palaciu de los González-Tuñón y xuntu al regueru Payón. Anque tradicionalmente atribuyóse la so construcción a Diego Vázquez de Prada a finales del sieglu XV, con permisu de los Reis Católicos, dellos estudios recién asítienla muncho primero, nel primer cuartu del sieglu XIII. Esa datación más antigua sofítase en ciertes característiques constructives y n'analises realizaos mientres les sos restauraciones.
Nos sos sieglos d'usu, la torre sirvió como cárcel señorial y como agospiamientu pa una pequena guarnición, que vixilaba y controlabal pasu per esti valle. El so allugamientu estratéxicu, nuna llomba y mui cerca de rutes que comunicaben la zona central d'Asturies cola Meseta, dába-y un valor militar evidente. Foi declarada Bien d'Interés Cultural en 1965, y a lo llargo del tiempu foi restaurada pa consolidar la so estructura, reparar resquiebros y caltener los sos elementos orixinales. Anguaño caltiense como unu de los testimonios más notables de l'arquitectura militar medieval asturiana, recordando la dómina en qu'estes torres yeren símbolu de poder y defensa nun territoriu apostáu.
La sienda del Osu
La Sienda del Osu ye una de les rutes cicloturistes y senderistas más populares d'Asturies, y non solo pola so guapura natural, sinón tamién pola so hestoria. Orixinalmente, el percorríu formaba parte d'una vía ferrial minera que, dende finales del sieglu XIX hasta los años 60 del XX, tresportaba carbón y fierro dende les cuenques de Quirós y Teberga hasta Trubia. Cuando'l tren dexó de funcionar, les víes quedaron abandonaes hasta que, nos años 90, decidió rehabilitase el trazáu pa usu recreativu.
La sienda percuerre un paisaxe espectacular de valles, montes, túneles escavaos na roca y pontes metáliques sobre'l ríu Trubia. Ta asfaltada, con pendientemui suave, lo que la fai perfecta pa percorrer en bicicleta o caminando. Tien delles variantes y tramos, sumando en total unos 60 kilómetros, anque'l percorríu más habitual pa families ye d'unos 20–22 km (ida y vuelta).
