Esti premiu, organizáu pola Conseyería de Cultura, Política Llingüística y Turismu a través de la Dirección Xeneral de Política Llingüística, tien dos fases. Na primera, el xuráu, presidíu pol director xeneral de Política Llingüística, Antón García, y integráu polos músicos Alicia Álvarez, Pablo Moro y Naomi Suárez, la periodista y escritora Aitana Castaño, y la filóloga y profesora Mercedes Ruisánchez, escoyía en setiembre d’ente los cantares presentaos aquellos que pasaben a la final, que foron: «Rambalín», de Rodrigo Cuevas, «La mesma revolución», de Silvia Quesada, «Cantar pa durmir un ninín», de Mapi Quintana, y «L’espeyu», de Slum Suit.

Los finalistes habíen defender nuna Gala Final los sos cantares, que diba celebrase’l 13 de payares nel Teatru Fantasio de Navia y que retresmitiría la RTPA, contando tamién cola participación de Lafu y Rebeca, ganadores de l’anterior edición del Premiu. La pandemia torgó estos planes, quedando reducida la gala a la grabación pa la RTPA, ensin públicu, coles más estrictes midíes de seguridá y hixene.

Una y bones celebrada la gala, presentada por Norma Méndez (que se mandó del gallego-asturianu) y Fernando Valle Roso (n’asturianu), el xuráu decidió premiar «Rambalín», de Rodrigo Cuevas, por unanimidá, llevando’l troféu y los 6.000 euros de dotación con que cuenta’l premiu.

«Rambalín» ye una habanera dedicada a la figura d’Alberto Alonso Blanco, playu y maricón de nacimientu a partes iguales; referente necesariu del panorama LGTBI asturianu, escaecíu poles nueves xeneraciones pero mui popular na época de los 60-70 en Xixón. Asesináu nel 76, y a día de güei nun resueltu l’asesinatu, esti cantar ye una especie de xusticia poética pa cola so figura. Con 2 testos de Fredesvinda «La Tarabica», lletra de Rodrigo Cuevas y música de Rodrigo Cuevas y Raül Refree, esti cantar intenta da-y la eternidá que merez a la figura de Rambal.

Rodrigo Cuevas (Uviéu, 1985) ye un fenómenu de les artes escéniques, igual que de la comunicación nel sentíu más ampliu; y la so repercusión, crecimientu y desenvolvimientu profesional sigue nuna progresión sostenida y sólida. A lo llargo de 2020, esti cantante, compositor, multi-instrumentista y axitador folclóricu va representando per tol país el so tercer espectáculu escénicu Trópico de Covadonga, que s’estrenaba nel mes de xunu de 2019 y que yá tien percorrío abondes ciudaes d’España. Cuevas ta acabante de llanzar al mundu’l so álbum nuevu, Manual de cortejo (Aris Música/Altafonte), con producción musical de Raül Refree. El discu ta algamando les meyores crítiques na prensa especializao y una acogida excelente per parte del públicu. A Rodrigo Cuevas présta-y rondar a la canción tradicional col cabaret y el cuplé, y disfruta faciendo conversar a la música electrónica col humor, la sensualidá y la crítica social, convirtiendo los sos espectáculos nuna esperiencia cultural y sensorial con denominación d’orixe.

Rambalín

Yera maricón de nacimientu,
una cosa mítica en Xixón,
fíu de Concha la Guapa
yera un ídolu, una ḥuerga
yera la madre que lu parió.

Por los cabarés de Cimavilla,
cantaba feliz por Marifé,
como reina de los playos,
si tal cosa se pasiara
por barriu tan popular
dalguna vez.

Cimavilla, cuando te pasia Rambal
su cadencia-y marca’l ritmu a la mar.
Cimavilla, paseíto de Rambal,
tiente envidia la Virxe de la Soledá.

Yera l’esplendor del barriu altu
Concha la Guapa salía anunciando: “¡Hoi hai función!”
y el barriu s’alborotaba,
Mari Loli a la guitarra,
los guaḥes emocionaos sujetáben-y el telón

qu’al abrir había una gran pamela,
tras la cual s’escondía Rambal.
La Tarabica-y aplaude,
Caracristo s’escojona
ante tal ostentación de llibertá.

LIibertá, Rambal, Llibertá
habíente llamar,
Llibertá, Rambal, Llibertá
habíente llamar.
Nun hai cosa más valiosa y difícil d’algamar,
con cuchillinos de plata-y la fueron a robar.

Cimavilla, cómo te llora Rambal,
tu cadencia nun-y marca’l ritmu a la mar,
Cimavilla, yá nun te pasia Rambal,
ta contenta la Virxe de la Soledá.

Cimavilla, paseíto de Rambal,
tu cadencia yá nun-y marca’l ritmu a la mar
Cimavilla, cómo te llora Rambal,
tiente envidia la Virxe de la Soledá,
Cimavilla, paseíto de Rambal,
tiente envidia la Virxe de la Soledá.

Rambal, Rambal…

Lletra: Rodrigo Cuevas