Asina como se pue lleer nel titular, anque paeza daqué ficticiu (y tamién sacao d’un capítulu de los Simpsons), asocedió n’Asturies un xuiciu escontra les tolines. Foi en Candás, con documentos que prueben esti fechu y qu’anguaño tán nel Archivu Históricu Provincial d’Uviéu. El documentu orixinal ye del 8 de setiembre de 1624 y ta firmáu pol escribanu don Xuan Valdés.
El xuiciu produzse nun contestu nel que la costa candasina ta enllena de tolines que comíen tola pesca de los marineros y rompíen les redes de los pescadores. Los vecinos, cansaos abondo d’esta xera, decidieron llevar a los animales a xuiciu, daqué secundao polos de Xixón. Había bien poco que la Universidá d’Uviéu principiara les sos actividaes académiques y escoyeron al catedráticu de Derechu Xuan García Arias de Viñuela pa representar a les tolines, mientres qu’ellos yeren defendíos pol cura de Candás.
Con too ello, punxeron rumbu p’alta mar, acompañaos d’un escribanu y de dellos testigos pa convocar, censurar y notificar a les tolines el xuiciu y la sentencia en voz alta. Ente ellos, taba un clérigu dominicu de la Santa Inquisición que-yos conxuró a qu’abandonaren la costa y dexaren de facer dañu. Esti xuiciu, qu’escapa a la racionalidá, yá que paez que tres lleer la sentencia, les tolines nun tornaron pela villa pesquera.
Anguaño, el pueblu de Candás reconoz esta hestoria con una estatua d’una tolina nel parque Maestro Antuña y amás, esti fechu tien reconocencia pol cronista oficial de Felipe IV, nun testu escritu 11 años dempués del socesu.
