Ye probable qu’esta selmana tengas una llista de películes de terror pa ver. Y de xuru que dalguna película que tienes nesa llista salió de la cabeza de Sergio Gutiérrez Sánchez, un guionista y director de cine que nació n’Uviéu nel añu 1973.
El so primer guión pa un llargomatraxe escribiólu bien mozu, a los 23 años. Él quería dirixilu, pero nun yera quien a atopar una productora qu’aceptara’l proyectu. D’esta forma, como munchos guionistes y directores de la so xeneración, optaron por formase a base de curtiometraxes. Asina rodó “Temporada baja” en 2003 y “7337” nel añu 2000. Esti últimu foi clave na so carrera. Ganó dellos premios en Xixón, Málaga, Oporto y Bruselas, y durante’l so rodaxe conoció a Juan Antonio Bayona, con quien nunos años estendería la idea del curtiu convirtiéndolo nun llargometraxe que diba estrenase nos cines. Eso sí, con otru nome que quiciabes vos suene: “El Orfanato”. Como curiosidá, “7337” rodóse n’asturianu y ye una ayalga de la cultura de la nuesa Llingua que paga la pena ver.
Con “El orfanato” Sergio nun dexó Asturies. Los exteriores de la casa pertenecen al Palaciu de Pataríu en Llanes. Un palacio indianu de 1899 que sirvió como hospital demientres la Guerra Civil.
Anque “El Orfanato” foi un despegue na so carrera como guionista (ganó el Goya a meyor guión original en 2008), siguiendo-y otros ésitos como “Lo imposible”, “Purgatorio”, o “Palmeras en la Nieve”, nun diba ser hasta 2017 cuando por fin podría estrenase tamién como director con “El secreto de Marrowbone”, un amiestu de suspense, drama y terror bien apropiáu pa estes feche que s’estrenó nel festival de cine de Toronto en setiembre de 2017.
Una cabeza que ensin dulda, nació pa peganos al sillón de la nuesa casa (o a la butaca del cine).
