José Gaos foi un filósofu doctor, catedráticu y académicu. Tuvo una gran trayectoria profesional y ética, y foi un gran divulgador de la Historia de la Filosofía, siempres tratando d’alcontrar la Filosofía verdadera. Y sí, yera asturianu. Gaos nació en 1900 en Xixón.


José Gaos yera’l mayor de 14 hermanos ente los cualos s’alcuentren l’actriz Lola Gaos y el poeta Vicente Gaos. José pasó la so infancia na casa de los sos abuelos maternos, n’Asturies, mientres los pas residíen en Valencia.


Tuvo el so primer averamientu a la filosofía a los 15 años mientres los sos estudios del Bachilleratu. Dempués licencióse en 1923 en Filosofía pola Universidá de Madrid. Nesa etapa tuvo influencies de los filósofos alemanes, y foi discípulu de los filósofos españoles José Ortega y Gasset y Xavier Zubiri.

Con una trayectoria perinteresante na que llegó a ser rector de la Universidá de Madrid, cola Guerra Civil tuvo que fuxir por mor de ser militante del PSOE y acabó en México nel añu 1938, donde entamó dando conferencies. Sicasí, la so mayor obra del pensamientu filosóficu diba desenvolvela equí en México, siendo un personaxe que vivió la sucesión de delles corrientes filosófiques y que causó delles crisis teóriques na so vida. También desenvolvió en México una bona carrera como traductor, con hasta 70 traducciones de Heidegger o Hegel, ente otros munchos filósofos.


Nun diba volver al so país natal y murió esiliáu en México D. F. en 1969 a los 68 años d’edá.