El Club Xeitu convoca'l so tradicional Concursu de Recoyida de Toponimia ‘Concha de Lama’, que nesti añu algama la so décima edición. El premiu, abiertu a trabayos de cualesquier de los pueblos del monte occidental ástur-lleonesa, amonta la so dotación económica nesta ocasión hasta los 500 euros, más la publicación de la obra ganadora dientro de la serie ‘Toponimia’ del Club Xeitu. Toponimia del Club Xeitu.

Con esta iniciativa, que dende'l so primer añu cuntó cola collaboración del Institutu Llionés de Cultura de la Diputación de Llión, pretende dase un nuevu impulsu a esti certame, qu'en términos xenerales cuntó con una gran aceptación tanto de participantes, cola ellaboración y presentación de trabayos de gran calidá, como del vecinderu de los pueblos, que collaboró nos trabayos y dempués esfrutó de la so resultancia al ser estos editaos.

Dende'l Club Xeitu, anímase a participar nel concursu pa recoyer y tresmitir esti elementu del patrimoniu inmaterial de los nuesos pueblos, en claru riesgu de desapaición, nuna iniciativa compartida ente una entidá cultural y la población llocal, que s'amosó útil n'ares a salvaguardar d'esta riqueza de la tradición oral y la concienciación de que la so recuperación y puesta a disposición pública ye un llabor necesariu y compartíu.

Según disponen les bases, publicaes na web www.xeitu.es, van poder participar trabayos de cualesquier de los pueblos de los conceyos de Vil.lablinu, Murias de Parés, Riello, Valdesamario, Sotu y Amío, Pandorial del Sil, Palacios del Sil, San Emiliano, Cabrillanes, Sena de Lluna y Barrios de Lluna (toos ellos de la provincia de Llión) y Pola de Somiedu, Cangas y Degaña (Principáu d'Asturies). Nellos, l'autor o autores han d'arrexuntar cuantos topónimos puedan ser recoyíos nun llistáu, mapes, ortofotos y elementos similares, a criteriu de cada autor. El plazu de presentación va allargase hasta'l próximu 1 de setiembre, y el fallu del xuráu, que va tar compuestu por persones venceyaes a la temática, va ser fechu públicu antes del 1 de payares de 2022.

Dende la so primer convocatoria, en 2012, el Concursu de Recoyida de Toponimia ‘Concha de Lama’ reconoció trabayos presentaos sobre les llocalidaes de La Majúa (Ignacio Prieto Sarro), Montrondo (Adriana García Martínez), L.lumaxu (Nuria Ménguez Rodríguez), Pinos (Leopoldo Antolín Álvarez), Villaseca de L.laciana (Alberto González Llames) Villanueva d'Oumaña (Roberto González Gutiérrez) y Rioscuro (Luis Fernández Fernández). Esti postreru, anguaño en preparación, va editase nos próximos meses. Un legáu escrito y visual que toma yá dellos pueblos de L.laciana, Oumaña y Babia, sumándose a los trabayos premiaos otros varios publicaos dientro de la serie editorial, que'l so responsable ye'l director del Serviciu de Cartografía de la Universidá de Llión, Ignacio Prieto Sarro.