El gran ociu que d’equí a unos años lleva ocupando les nueses conversaciones pa romper el xelu son, ensin dulda, les series. De va tiempo yá nun decimos “Cómo ta’l tiempu de llocu”, agora dicimos “¿Y tu qué serie ves?”. Y como n’Asturies tenemos escenarios dignos de les meyores hestories, güei vamos falar de cuatro series que se rodaren na nuesa tierra.

Vientos de agua

Foi una producción arxentino-española que fala del esiliu d’un asturianu a Arxentina nel añu 1934 pola crisis política, y cómo el so fíu tien qu’escapar d’Arxentina y tornar nel añu 2001 pola crisis económica. La serie rodóse en zones como Xixón, Sotrondio, la sablera d’Estañu, Muñes, Prieres, Sotu d’agües y L’Entregu. Anque la serie recibió mui bones critiques pol bon usu que fizo del paralelismu ente les dos hestories migrantes, la audiencia paez que nun lo apoyó lo suficiente y acabó retirándose de la parrilla tres cuatro emisiones, d’un total de 13 capítulos.

La zona

Rodóse en Xixón, Uvieu, La Felguera y Pravia. Foi una serie bien reciente, del añu 2017, producida por Movistar+ que cuenta la hestoria de Héctor Uría, un inspector que regresa al serviciu dempués de ser el únicu superviviente d’un grave accidente d’un reactor nuclear. Héctor pertenecía a un grupu que acudió en socorro de la central nuclear y agora tien qu’investigar el misteriosu asesinatu d’un home nesa zona. Una serie que surdió en plenu “boom” de series como Chernovil que tenía preparada dos temporaes, pero foi cancelada dempués de la primera.

La señora

Foi una serie dramática qu’emitió TVE ente los años 2008 y 2010. La hestoria ta situada en va 100 años, en 1920, nun momentu nel que les diferencies de clases son bien notables y la tradición y la fe manden sobre la razón. Nesta serie, Victoria, fía d’un poderosu burgués enamórase de Ángel, miembro d’una familia de mineros. Tuvo tantu ésitu que tuvo un “spinoff” 14 de abril. La repúblicapero nun tuvo al altor de la so predecesora

Doctor Mateo

Foi la adaptación de la serie británica Doc Martin protagonizada pol cómicu británicu Martin Clunes. Equí foi Gonzalo de Castro l’encargáu de da-y vida a Mateo, un prestixosu ciruxanu de Nueva York que por problemes d’aversión a la sangre, tien que tornar al so pueblu, onde exerce como médicu. El pueblu llamábase San Martín del Sella, pero taba bien claro qu’esi pueblu nun yera otru que Llastres. Esta serie amiestu de comedia y drama supo mui bien utilizar el paisaxe como un elementu indispensable pa la hestoria, llegando a ser casi un personaxe más. La serie llegó a tener un bon respaldu de crítica y audiencia demientres un total de 5 temporaes. Con actores bien conocíos como el yá mencionau Gonzalo de Castro, Rosario Pardo, Natalia Verveke y el cómicu Alex O’Dhogherty, y unos argumentos divertíos, munches veces col choque ente la gran ciudá y la familiaridá de los pueblos como protagonista. Llevó a Asturies a lo más alto de les audiencies televisives estatales y fizo de Llastres un de los destinos turísticos más solicitaos d’Asturies.