Esta fin de selmana'l to plan cultural ta en Candás, col nuevu Reguerada Fest, qu'axunta a la cultura y al mundu empresarial que s'espresa n'asturianu. La programación, gratuita y empobinada a tolos públicos, inclúi una feria, recitales lliterarios, talleres, charres, esposiciones y conciertos. La Fábrica d'Ortiz va acoyer la feria d'empreses, con quince entidaes participantes: Acuto, Al Otru Andar, Cerveza Cotoya, Cuatro Gotes, Díes Adulces, Ediciones Trabe, Espacio Nube, Música Asturiana, Puru Remangu, Pintar-Pintar Editorial, Ringo Rango, Tiza y Peonza, Nordeste Móvil, Delallama y Mondo Manzana.
El programa inclúi meses redondes sobre l'actividá empresarial y l'usu de la llingua asturiana, actividaes artístiques, amás de charres que van tratar asuntos como les esperiencies de xestión y programación n'espacios rurales, la traducción a la llingua asturiana, alcuentru de ceadores o llectures poétiques. Van faese amás talleres de baille tradicional, de llectura, o de poesía y cómic pa tolos públicos.
La esposición Soi yo lleendo, comisariada pola galería Dos Ajolotes, pon en relación a dellos autores de lliteratura asturiana, al traviés de los sos testos, con artistes que trabayen inspirándose naquellos conteníos pa ufiertar la so interpretación personal dende l'arte. La ufierta musical del Reguerada Fest va tener nel cartel a la Orquesta Céltica Asturiana, Pop Piquiñín, Xosé Antón Ambás y Ramsés Iglesias. Tamién va poder esfrutase de la música tradicional de L-R, el dúu formáu por Leticia Baselgas y Rubén Bada, y propuestes de fusión ente poesía y música llectrónica. Les artes escéniques tamién van tener el so espaciu cola reinterpretación del teatru costumista de Pachín de Melás al cargu de la compañía Vibra y una revisión del monólogu tradicional por Carlos Alba, Cellero, ente otres actividaes.
Toda la información la tienes disponible en: http://www.asturiesculturaenrede.es/as/programacion/3449/reguerada-fest.html