La de Silvia Quesada ye una de les voces más orixinales y personales de la música asturiana. Formó parte de la Banda de Gaites Cántara y del colectivu Muyeres. Amás, foi voz de los grupos folk Los gatos del fornu, Blima y Tejedor. Sicasí, la so carrera en solitariu ta diendo pelos caminos del pop, yá señalaos con "La pena abierta" y confirmaos col so discu nuevu, "Prefiero ver llover". Falamos con ella pa siguir conociendo Asturies.

Un llugar pa perdese una fin de selmana. Yo soi de les persones que piensen que ta mui bien conocer munchos países pero qu’enantes d’eso hai que conocer lo que tenemos alredor, nesti casu n’Asturies. Decidíme por un llugar namás paezme mui complicao, por eso voi dicir trés nos que pasé fines de selmana mui guapos: La Pola (Somiedu), Teberga y Arenas (Cabrales). Pero realmente n’Asturies cualesquier sitiu ye perfectu pa pasar una fin de selmana, lo importante ye dir cola compañía adecuada.

Un llugar pa vivir. Llevo yá unes cuantes mudances al llombu, como bona mayestra interina, pero de tolos sitios nos que viví, quédome con L’Arena y, sobre too, con A Veiga. La xente estráñase d’esti últimu, pero siempres que voi marcho con una pena mui grande, siéntome una veigueña más y creo que nun m’enquivoco si digo que los veigueños me consideren una d’ellos.

Un platu. Soi mui de platos de cuchara. Pa comer en casa, llenteyes, y si voi comer fuera, pote o callos.

Un postre. Como canto nuna canción: «prefiero más llegar sin fame al postre».

Una sablera pa pasar el día. Siempres me prestó la de Cueva, nel conceyu de Valdés, pero agora nun me perdonaría nun falar de la de Los Quebrantos, en L’Arena; viví ellí un añu y picu y, anque los oriundos nun la pisen muncho, pa min siempres va ser un llugar especial.

Un pueblín que nun podemos dexar de ver. Os Teixois, ensin dulda. Ye un pueblu del conceyu de Taramundi con un encantu espectacular. Cuando tas ellí ye como si tornares p’atrás nel tiempu dellos sieglos.

Un chigre o zona pa tomar unos culinos. Nun podría quedar namás con unu. Cuando toi n’Uviéu voi bastante a Gascona, pero'l chigre de la capital que más me presta pa tomar unos culetes ye la Sidrería Serafín. En Turón también hai unu imprescindible cuando falamos de sidra: el Chuchu. Amás, tanto nel Serafín como nel Chuchu cómese d’escándalu, 100% aconseyable.

Un parque natural pa visitar. Toi más verde nesto de la naturaleza… Supongo que por cercanía habría dicir el de Fuentes del Narcea, pero creo que toos merecen la pena.

Una fiesta a la que nun faltar. Barriendo un poco pa casa, San Roque de Tinéu.

Un muséu pa recomendar. La mio segunda profesión, el maxisteriu, llevóme toos estos años a conocer abondos museos asturianos. Sicasí, al últimu que fui, el Muséu de Belles Artes d’Uviéu, llevóme la faceta de cantante. Nun tuviera nunca ellí. Fui a cantar convidada por Pablo Moro y flipé. Tovía nun pude percorrelu enteru, ye una cuenta pendiente que tengo, pero dende llueu que ye recomendable.

Un momentu de la hestoria que te prestaría vivir. Del pasáu dalgún qu’otru, pero hai unu qu’espero vivir nun futuru non mui llonxano que ye la oficialidá de la llingua asturiana.

Un baille pa pasalo bien. Yo nun soi muncho de baillar, tengo que reconocelo, nunca tuvi munchu xeitu… Pero, anque lo faiga mal, nunca me resistiré a baillar un Saltón.

Una pallabra n’asturianu que te preste Calecer.

Una tradición que nun pue perdese. El batéu d’oru, los navayeiros… Hai munches tradiciones y profesiones que nun habríen perdese.

Una espresión n'asturianu. Esta ye difícil… ¡Hai munches! Pero tovía güei sentí una que nun concía y que me prestó muncho: “Una focicada dala cualquier gochu”.