El skateboard ye un deporte que ñació na cai, una actividá mui que, anque ye bien popular en delles zones urbanes, entá nun hai un gran númberu de federaos oficiales.

Esi calter caleyeru y accesible pa mozos y moces de cualesquier clas social ye un espíritu que pega dafechu col conceyu de Castrillón y el so sofitu polos deportes que defienden esos valores de diversión, xunión y cultura de cai. Por eso Castrillón apostó fuerta pol Eolo Skate Park de Salinas, dempués d'años de construcción (paraos por mor del andanciu). Esti parque inaugoróse'l 27 de xunetu de 2021 nuna parcela d'unos 1400 metros cuadraos na cai Pablo Laloux, frente al Club Espartal. Nesta ablucante instalación pueden practicase non namás delles modalidaes del skateboarding amás d'incluyir una zona diseñada pensando nel surf y nos skates de carving. Son zones claramente diferentes por diseñu, anque les trés tán integraes nun parque de skate únicu y completu que permite patinalu nel so conxuntu.

La idea de construyir esti paque xurdió d'un videu nel que podía vese a los skaters profesionales Danny León (España), Alex Sorgente (Italia) y Zion Wright (Estaos Xuníos) patinando nel interior d'un tramu de torre eólica. De fechu, el parque tien una réplica d'esi tramu: un tubu de 25 metros de llargor y un diámetru d'ente cuatro y cinco metros y mediu dispuestu de forma horizontal a mou d'una gran 'U' cilíndrica.

Esti videu, promocionáu pola marca de refrescos Red Bull (organizadora anguaño de dellos eventos y competiciones mundiales de skate), fixo qu'esta marca se xuntara con Windar Renovables S.L. y el conceyu de Castillón pa construir el Eolo Skate Park. Daniel Yabar foi l'encargáu de diseñar el proyectu del Eolo. Trátase d’un gran espertu en diseñu de parques de skates (responsable de parques de grandes ciudades como Alacant, Gasteiz o Santiago de Compostela).

El parque promete da-y visivilidá a esti deporte que tan bien casa col espíritu de Castrillón, un llugar nel que yá se celebra un de los festivales de surf más importantes del mundu, un deporte cuasi hermanu del skate. Red Bull tien el compromisu d'organizar nesti parque dalgún actu de proyección internacional nun futuru non mui llonxanu. Una apuesta nada descabellada teniendo en cuenta qu'en Castrillón tienen esperiencia n’acoyer competiciones d'esti calibre. El restu del proyectu tuvo en manes de la empresa Zut Skatepark encabezau por Javier Labad.

L’Eolo Skate Park ye una oportunidá d'oru pa conocer un deporte caleyeru que ta poniéndose cada vegada más de moda, y del que s'espera un puxu por mor de la so inclusión nos xuegos olímpicos. El Castrillón más esportivu, caleyeru ya internacional ta, ensin dulda, nesti parque que va dar muncho que falar.

Puedes descubrir más d'esti llugar y d'otres ayalgues del conceyu de Castrillón nel nuesu espaciu na Feria de Muestres de Xixón.