Susana Rodríguez Sela (Uviéu, 1968). Llevantó la llibrería Seronda, na que tuvo trabayando ocho años. Présten-y les llingües, y fala, amás del asturianu y castellanu, gallegu, inglés, francés, y un pocu de catalán. Pertenez a l’Asociación Cultural ‘Escontra’l Raigañu’, na que s’encarga de los trabayos d’investigación. Amás ta somorguiada en proyectos de noveles xuveniles, cuentos para la reciella y poemarios. Destaca tamién la so amplia trayectoria nel mundu de la cultura

Un llugar pa perdese una fin de selmana… Gústame munchu la montaña, asina que perderíame en dalgún llugar pel que pudiera calzar les botes y tirar p’arriba. Por exemplu, les montañes de Ponga

Un llugar pa vivir… Viviría feliz en munchos pueblos d’Asturies, con una finca y una casina. Voi escoyer La Rebollada (Carreñu). 

Un platu… Berces. Siempres me prestaron munchu. Agora toi experimentando coles opciones veganes. 

Un postre… Arroz con llechi. Esta ye difícil, soi llambiona y escoyería tantos…

Una playa pa pasar el día… Oleiros. Ye un requexu enlleno de bones remembrances pa mín

Un pueblín que nun podemos dexar de ver… Por exemplu, Bermiegu. Un pueblu que tendría que cuidase bien, col so texu, el rebollu, los horros, y otres tantes xoyes del nuesu patrimonio cultural. 

Un chigre pa tomar unos culinos… La Blimal. Pa xintar bona comida, con grandes opciones veganes, el Chigre de Faéu. Ta nun sitiu espectacular y toi naguando por volver.

Un parque natural pa visitar… Redes. Por decir ún. 

Una fiesta a la que nun faltar… Seronda d’Avilés O cualquier folixa que trabaye por caltener les nueses tradiciones.

Un muséu pa recomendar… Parque de la Prehistoria, en Teberga

Un momentu de la hestoria d’Asturies que te prestaría vivir… Prehestoria. Ye una dómina que llamóme siempres l’atención.

Un baille pa pasalo bien… Un saltón. Los bailles asturianos son perprestosos y l’ambiente alrodiu d’ellos, perbono.

Una pallabra n’asturianu que te preste… Seronda. Al mio güelu encantaba-y esta estación.

Una tradición que nun pue perdese… toles tradiciones son parte del nuesu patrimoniu cultural, ye per importante calteneles

Una espresión n’asturianu que te preste… Caún que cabruñe colos sos fierros. Soi mui de refranes. Pero voi quédame con esi, porque la xente ye mui de meter les ñarres na vida los demás. Y ye importante vivir y dexar vivir.