N'Asturies destaquen pola so guapura y magnitú cascadas de Oneta (Villayón), Xiblu (Teberga), Aguas Blancas (Cangas del Narcea), Llaímo (Sobrescobio), Fiollo (Castropol), Patines (L.lena), Aguasaliu (Amieva) y Tabayón del Mongayu (Casu). Siendo posiblemente esta última la más notable.

Pa contemplar la gran cascada del Tabayón hai que movese a tierres casines de la sierra del Mongayu. Ente los puertos de Tarna, Les Señales y San Isidro, llugares polos que puede aportase a ella en llargues travesíes montañeres.

Pa una caminada sele lo más aconseyable ye tomar como puntu de partida'l pueblu de Tarna, o la zona de Les Torres. Nesta zona entróncase'l Nalón col ríu de L'Ablanosa, que baxa de la vega del mesmu nome y de la de Pociellu. El Nalón cerca d'esi llugar abre'l desfiladeru de Les Canales o d'Entrepeñes. Tamién dende'l famosu monte de Reres podría visitase esta cascada, pasando poles citaes vegues de Pociellu y La Ablanosa.

Nós recomendamos salir del pueblu de Tarna per una caleya, cruciando pol fermosu monte d'especies arbórees autóctones de Saperu. Equí habiten una montonera d'especies faúniques, dende cérvidos a xabalíes, pasando por munches aves rapaces nocherniegues y diurnes, anfibios, reptiles ya insectos. Tamién hai equí dellos cantadorios d'urogallu y nun ye infrecuente la presencia de llobos. Nes altes cotes engaten con gran maña los rebecos y polos árboles salten velozmente los esguiles.

El camín que nos lleva por esti monte denomínase Pedregalón, y pasa pola mayada de Los Cabaniellos. Tamién poles fontes y regueros de Rodrigu y Arellales. La xubida va ser lenta y si acompaña la suerte y vamos ensin facer enforma ruiu, vamos poder ver dalgún mustélidu fácilmente. Tamién corzos y esguiles, polo cual ye aconseyable parase dalguna vegada a contemplar la Naturaleza.

Dempués de dos hores de sele caminada, vamos empezar un pequenu descensu hasta l'amplia vega de La Campona. Equí vamos ver yá la cascada de Tabayón del Mongayu.

La cascada de Tabayón la forma'l ríu del Mongayu, afluente del ríu de L'Ablanosa, de la mesma, como diximos enantes, tributariu del Nalón. Na parte cimera d'esa cascada ta la vega del mesmu nome, a unos mil cuatrocientos metros d'altitú. Y, casi doscientos metros más embaxo, atópase la vega La Campona, onde ún de los sos estremos cai serpenteante a la cascada. Ente les dos vegues citaes y según se mira a esi saltu d'agua, a la so derecha, hai un empináu senderu que pasa peles fasteres de La Cuchella, Requexines y La Rasa, ente arboláu autóctonu y l'estrueldu de l'agua que se descuelga torrencialmente.

Dempués de folgar y reponer fuerces nes praderíes La Campona, podemos tornar al pueblu de Tarna pol mesmu camín de la ida. O tomar el senderu de Les Torres, que va dende esta vega, siguiendo'l ríu de Mongayu, hasta qu'esti xunta col de L'Ablanosa. Tres esa confluencia, el camín, yá más anchu, sigue tamién en dirección norteña hasta la carretera (AS-17). En Les Torres podemos dir el pocu trechu que nos resta pal pueblu de Tarna, bien pela carretera o per un camín o caleyón que va casi paralelu a ella. Vamos tardar casi lo mesmu qu'a la islla, per otra ruta, una dos hores, a pasu sele.