Nel silenciosu conceyu de Teberga, en plenu monte asturianu, escuéndese unu de los secretos más insólitos del patrimoniu asturianu: dos momies naturales que xacen, inmóviles y observaes al traviés del cristal, nel interior d'una colexata románica. Son los cuerpos de Lope de Miranda y Ponce de Llión y el so fíu, Pedro Analso de Miranda, figures de la nobleza del sieglu XVII que'l tiempu convirtió n'espectros inmortales del pasáu.
¿Quién son les momies de Teberga?
La hestoria empieza con Lope de Miranda, I Marqués de Valdecarzana, fináu en 1688. Acompáñalu el so fiu Pedro Analso, abá y darréu obispu, fináu en 1731. Dambos pertenecíen a una poderosa familia de l'aristocracia asturiana, los Miranda, que la so inflúencia tomó la política, la Ilesia y la vida local mientres xeneraciones. Anque los sos méritos fueron notables, les cróniques populares recuérdenlos más pola so severidá que pola so virtú. Tal foi la so fama que, tres la so muerte, empezaron a circular lleendes sobre'l so temperamentu despóticu y les consecuencies qu'ello traería más allá de la tumba. Como toa reliquia con un aura macabra, les momies nun escaparon a la mitoloxía popular. Dizse que la so momificación ye un castigu divín pola so crueldá en vida. Nes sos boques abiertes, que paecen implorar perdón, los visitantes ven l'ecu d'una penitencia non cumplida.
¿Y ónde tán?
El llugar onde reposen ye igualmente impresionante. La Colexata de San Pedro de Teberga ye un templu del sieglu XI con raigaños prerrománicos y romániques. Nel so interior alienda hestoria: naves sobries, capiteles con besties tallaes, y un impresionante Cristu románicu policromáu del sieglu XIII. Un marcu ideal p'alimentar lleendes. Les momies, primeramente asitiaes na cripta, fueron treslladaes nel sieglu XX a un pequeñu muséu interior, visible dende un pasiellu eleváu con barandiella de fierro. Anguaño, esíbense n'ataúdes de madera con tapa de cristal, nun ambiente respetuosu y controláu.
La colexata y el muséu pueden visitase por un preciu simbólicu (alredor de 2 €), davezu les fines de selmana y festivos. Les visites empuestes ufierten contestu sobre l'arte del templu, la hestoria de los Miranda y el procesu de caltenimientu de los cuerpos. Encamiéntase comprobar los horarios actualizaos na oficina de turismu de Teberga o per aciu la so web oficial, yá que pueden variar según la temporada.