TPA emite güei, miércoles 25 de payares a les 23:30 hores, el segundu capítulu del documental que percuerre la hestoria de la lliteratura asturiana fecha por muyeres a lo llargo de la hestoria.
Nesti segundu capítulu d’ Elles, muyeres na lliteratura asturiana, Sonia Avellaneda percuerre’l sieglu XX, hasta l’apaición del Surdimientuy el cambiu de paradigma que supón nos años setenta. Setenta años nos que tenemos una amuesa muncho mayor d’autores, que vivieron momentos mui estremaos, el comienzu de sieglu, los movío años trenta, la Guerra, l’exiliu, la dictadura franquista. Una apasionante hestoria na que conocemos a muyeres como María Balbín, Tuxa Villaverde, Elvira Bravo, Ángeles López Cuesta, María Xosefa Canellada, Eva González, Floria Alías, Nené Losada Rico o María Elvira Castañón. Muyeres que fueron exemplu de llucha y superviviencia en momentos difíciles, asina como tresmisiores del idioma y la cultura d’Asturies.
L’espaciu “Elles, muyeres na lliteratura asturiana”, realízalu Cuatro Gotes Producciones, ta presentáu pola periodista Sonia Avellanada, y tien guión y dirección del periodista y Doctor n’Humanidaes Inaciu Galán, cuntando col asesoramientu de les escritores y estudioses de la lliteratura asturiana Marta Mori, profesora de la Universidá d’Uviéu, Esther Prieto, editora, y María Esther García, presidenta de l’Asociación d’Escritores d’Asturies.
Más de mediu centenar d’investigadores y escritores participen col so testimoniu nesti documental, cuntando les característiques de cada autora, la novedá y la importancia de la so obra.
