Nel oriente asturianu tán dalgunes de les sableres más espectaculares d'Asturies, combinando paisaxes de postal con entornos naturales únicos. Dende llargues estensiones de sable dorao hasta requexos escondíos ente cantiles, estes sableres ufierten esperiencies pa tolos gustos. Darréu, encamentámoste trés sableres bien distintes ente sí, pero igual d'especiales, ideales pa esfrutar del branu n'Asturies. Si t'apetez daqué menos concurríu, tamién hai sableres del occidente que paga la pena visitar.
Sablera de La Espasa
Ta llendando colos conceyos orientales de Colunga y Caravia, dixebraos naturalmente pel ríu Espasa, al cual esta sablera debe'l so nome yá que la so fin ta na mesma. Tien unllargor de daqué más de 1 km y el so sable ye finu de color turráu. L'aguaxe ye moderáu anque suel haber vientu davezu, lo cual puede picar la mar.
Puede llegase en coche hasta la sablera, habiendo parking de pagu xustu a la so entrada. Al ser una superficie bastante llana ye una sablera accesible pa persones con movilidá amenorgada. Dispón de ramples d'accesu y pasareles hasta los arenales, amás d'otros servicios como duches y baños adaptaos.
Ye una sablera bastante familiar, yá que cunta con parque infantil pa neños, máquines xerontolóxiques pa los mayores y un par de chiringos-restoranes. Tamién dispon d'aseos, duches y zona de merenderu mesmo que serviciu de salvamentu, que'l so horariu ye de 12 a 19h. Al ser airosa y con aguaxe, actividaes que puedes resultar mui atractives son el surf o probar a volar cometes.
Llamentablemente, los animales nun tán permitíos ente les 9 y 21h nel horariu de branu.
Sablera de Cuevas del Mar
Asitiada a la desembocadura del ríu Nueva nel conceyu de Llanes, ye una de les sableres más turístiques del oriente asturianu. Pel branu ta bastante concurrida. El pueblu más próximu ye Cueves a tan solo 5 minutos en coche, conocíu pola so arquitectura indiana. De forma triangular, mide 125 metros de llargu y casi 50 d'anchu. Ta formada por bolos y arena blanca. L'aguaxe ye moderáu.
Ha destacase les enormes formaciones rocoques que chisquen la so vera, de piedra caliar erosionaes pol aguaxe del mar que conformen un paisaxe guapísimu. Amás dexen a la vista numberoses cueves y túneles a esplorar polos curiosos siempres y cuando haya baxamar. En temporada baxa, munchos escueyen esta sablera pa practicar la esguilada deportiva por cuenta de la so xeografía rocosa. Pel branu, ye ensin dulda'l llugar perfectu pa tomar un bañu.
Esta sablera ye accesible en coche, puede aparcase nun parking de pagu próximu a la sablera, anque esti ye de tamañu amenorgáu. Hai serviciu de salvamentu, duches y aseos, amás d'un chiringu.
La presencia d'animales domésticos ta prohibida mientres la temporada de branu, del 1 de xunetu al 30 de setiembre.
Gulpiyuri
Allugada tamién nel conceyu de Llanes, al norte de la localidá de Naves, ye la sablera más oriental d'estes 3 y probablemente la más peculiar. Ye de sable blanco y mide poco más de 40 metros, pero tien una característica muidistintiva: ye una sablera d'interior, nun tien salida directa al mar. Y ye que l'orixe de Gulpiyuri débese a la combinación d'una depresión nel terrén y l'erosión del mar nos cantiles próximos, dando llugar a esti accidente xeográficu tan singular.
Enantes de dir, ye imprescindible mirar les marees yá que en pleamar aseméyase más a una piscina d'agua salao qu'a una sablera y ye l'únicu momentu nel qu'hai aguaxe. Ye ideal pa dir con neños en baxamar por cuenta de la so tranquilidá. Nun cunta con nengún serviciu y nun ye accesible en coche. L'accesu ye namás piatonal y puede realizase dende Naves. Ye namás una pequeña caminada de 15 minutos.
Foi declaráu monumentu natural en 2001. Ideal p'amantes de la naturaleza gracies a la so interesante xeomorfoloxía, fauna y flora.
