Va pocos díes que unu de los festivales de música más importantes ente los realizaos n'Asturies y que mayor públicu acueyen, el Tsunami Xixón, dio a conocer les bandes musicales que participaríen nel eventu de 2023, que cumple la so quinta edición. Ente los grupos coláronse dellos artistes de la escena musical asturiana, que repasamos güei en VerAsturies. Porque la música asturiana ta presente en toos llaos.
Desakato
El grupu de mayor proyección n'Asturies y n'España va presentar el conciertu de despidida «Vivir a morrer», que va ser, presumiblemente, la única actuación que va facer la banda de Llanera en suelu asturianu. Desque nacieren en 2003, fueron creando un proyectu duru y constante y que basa la so pilastra fundamental nos directos, siendo una de les bandes que meyor presenta la defensa de les sos actuaciones. Les sos lletres, que cavilguen sobro la sociedá y critiquen el sistema y les inxusticies sociales, tampoco dexen llugar a duldes sobre la banda, los sos valores y el so compromisu social.
Ilegales
En 1977, Jorge Martínez, Juan Carlos Martínez y David Alonso formen el tríu «Madson» n'Uviéu. 3 mozos con poca esperiencia empezaron a esperimentar soníos, tríu que más tarde en 1979 convirtióse en «Los Metálicos» qu'arrastró bien de xente n'Asturies. A finales de 1980, Juan Carlos Martínez sal del grupu y ye reemplazáu por Íñigo Ayestarán nel baxu. Eseimesmu añu bautizaron a la banda col nome d'Illegales. 41 años dempués, van pisar l'escenariu del Tsunami Xixón presentando'l so últimu discu, La lucha por la vida, que van alternar colos grandes ésitos de la so dilatada trayectoria.
Mala Reputación
Dende l'oriente, va siguir poniendo la música asturiana Mala Reputación, naturales de Cangues d’Onís. Lleven percorriendo l'estáu dende la so fundación nel añu 1995 y, agora, lleguen al festival del branu xixonés con ganes de poner pates arriba a un públicu que los recibirá como lo que son, unos pioneros del punk rock n'Asturies.
Misiva
El papel de Misiva, con 13 años de trayectoria a los sos llombos, ye unu de los más importantes na musica asturiana, cantando puramente n'asturianu. Con un punk rock que recuerda a los meyores grupos de la escena, los moscones van xubise a les tables del Tsunami Xixón. Sicasí, nun va ser la primer vegada que tean dientro del cartelu del festival. Yá na so primer edición tuvieron la oportunidá de tocar nel skatepark de Cimavilla.
Me Fritos and the Gimme Cheetos
Me Fritos and the Gimme Cheetos naz nel añu 2016 como un proyectu similar al de la banda americana “Me first and the Gimme Gimmes” (Fat Wreck Records), pero a la española. Amantes de la folixa y la partyhard, busquen dar una vuelta de tuerca a esos cantares que toos conocemos p'afaeles a un estilu Punk-Rock melódicu, rápido, antroxador y pa tou tipu de públicu. Los asturianos repiten tres l'ésitu que tuvieron na edición del añu 2022, enllenando de clásicos el recintu del Tsunami Xixón.
The Black Panthys Party
Si tas cansáu d'actitúes normales, estereotipos musicales y de bandes correchamente incorrectes. Quiciabes puedas dicir que TheBlackPanthysParty ye la meyor banda Punk HxC, calidá aprecio de la hestoria. Asina se define esta banda de hardcore asturiana caracterizada por cantares d'humor acedo. Agora, los asturianos que formaron esta banda nel añu 2002, vuelven al festival dempués de participar na edición del añu 2018.
Viuda
Cuatro asturianes xuntaron el so talentu y bruxería pa dar a conocer Viuda, un proyectu nel que punk y copla fúndense. A golpe de castañuela y como si d'un pasu de Selmana Santa tratárase, la condena y lo escuro del destín son temes recurrentes nes sos lletres, tamién con llixeros toques de reivindicación y macabra ironía. Les asturianes lleguen al festival con ganes de dalo tou y faer de l'actuación un auténticu ritual satánicu.
International Hardcore All Stars
Pirri (Escuela de Odio), Ivo y Ramón (The Lirium), xuntu con Dimas y Adrián (veteranos músicos de la escena underground) preséntennos International Hardcore All Stars. Tratar d'un interesante proyectu tributo a los grandes clásicos del Hardcore y el Punk, afaciendo al castellán los sos ésitos más destacaos. Los cantares de les grandes bandes del hardcore van sonar al traviés d'ellos.
Strangis Guajes
La banda de punk hardcore que nació nos empiezos de los años 90 vuelve para faer cimblar a un públicu precisáu d'estos grupos na música asturiana. Tamos seguros de que nun van dexar a naide indiferente.
Maverick
Los mozos componentes de Maverick, banda de recién creación de Mieres, lleguen al Tsunami Xixón p'amosar qu'hai relevu na música asturiana alternativa. Col so pop punk, van presentar nel festival el so primer trabayu d'estudiu, Esistir – Persistir, con temes como No hay final o Travis Bickle.
Flashback
Flashback ye una banda asturiana de Punk-Rock melódicu formada por mozos artistes, influyíos pola escuela californiana de los 90, pero incorporando detalles y matices que se nutren de diversos estilos y bandes más modernes. La banda formada nel añu 2017 va amosar la fuerza que caracteriza al punk rock.
