Carmen Losada Rico, meyor conocida como Nené Losada, foi una poeta valdesana qu'escribía n'asturianu occidental, con un obra lliteraria que recueye de manera escepcional la lliteratura oral de la zona. La so vida, que nun foi facil, trescurrió por dellos llugares del conceyu de Valdés y por eso, queremos que visualicéis les hestories de los sos poemes al traviés d'una ruta por esti conceyu.
El percorríu d'esta ruta empieza, como nun podía ser d'otra manera, en Ḷḷuarca, villa onde nació y onde vamos conocer seis llugares: la casa de la cai Caleros, onde nació la poeta, la ilesia de Santolaya, el puertu, la sablera, el paséu del Pilarín y la Fonte’l Bruxu, a cada cual más emblemáticu na villa blanca. Dempués, tamién pueden visitase otros llugares como'l campu onde se celebra la conocida fiesta de San Timotéu. Sicasí, la so vida nun ye solo la vida de Ḷḷuarca, sinón que, tres la muerte del so padre, tuvo que treslladase a San Fliz, en Trevías, onde diba vivir mientres dellos años. Ellí y na so contorna tán los llugares que la poeta, Nené Losada, reflexó a lo llargo de la so obra, en sitios como por casu Argumosu, Ḷḷagu y Merás, Brieves o Trevías y onde podemos faer una idea del mundu nel que vivía Nené y que tresmitía nos sos escritos.
Esta ruta tien delles paraes, pero cada rincón del conceyu guarda una parte de la obra compuesta por Nené Losada, una obra única que nun se puede entender ensin conocer el mundu rural qu'arrodiaba a la poeta y que ye imprescindible en caúna de les palabres que la valdesana escribió.
