Cunta la lleenda qu'Asturies nun pasáu llonxanu unos homes de la mar llegaron coles sos embarcaciones a Cuideiru. Según se cunta yeren viquingos, y crearon dellos puertos a lo llargo del mar Cantábricu onde reabastecíen les sos naves pa siguir camín d'otres tierres como Galicia o Andalucía. Cuideiru, un pintorescu pueblu pesqueru de la mariña asturiana, onde les sos cases se llevanten nes fasteres de los trés montes qu'arrodien la localidá, na que tiempu atrás s'asitió una espedición viquinga.
Les cróniques medievales asturlleoneses falen d'hasta cuatro folaes d'estes incursiones de turistes escandinavos pel Reinu de los Ástures ente los sieglos IX y XII. Nel branu del añu 844 vióse una flota viquinga na mariña de Xixón camín de Galicia, onde se dedicaron al pillaxe.
Nel añu 925 Asturies y Llión xuniérense nun únicu reinu y los ataques viquingos aceleraron el procesu d'unificación territorial y militar pa poder facer frente a los tarrecibles homes del norte. El rei Ramiro I ganólos a los pies de la Torre d'Hércules, destruyéndo-yos alredor de 70 naves, anque los supervivientes siguiríen les sos correríes pel Al-Ándalus escalando Lisboa y Sevilla. Inclusive Uviéu foi asaltada en tiempos d'Alfonso III, motivando la construcción de La Torre Vieya de Samiguel, amiesta a la Catedral. Anque n'ocasiones los mesmos monarques recurrieron a los sos servicios, bien pa les sos lluches intestines o bien pa la guerra contra los musulmanes, como nel casu d'Alfonso II contra Hisham I nel 795.
Sicasí, a pesar de cuntar con nicios d'asentamientos temporales en Galicia, el que fuera unu de los territorios peninsulares más castigaos polos sos ataques, nun tenemos nenguna prueba documental nin arqueolóxica qu'acredite l'improbable establecimientu de grupos de normandos en tierres asturianes. Los asentamientos viquingos nes mariñes cantábriques daten del principiu de la so llegada, a mediaos del sieglu IX. Y permanecieren dalgunos d'ellos hasta principios del sieglu XI.
La lleenda en Cuideiru remóntase a l'Alta edá media, dómina na que nel reinu d'Asturies taba'l Rei Alfonso III, los normandos procedentes naquellos tiempos de Dinamarca, asítiase en Cuideiru estableciendo un puertu base dende onde recargar los sos barcos camín de saquear la bayurosa Al-Andalus, o les mariñes de Galicia. Ellí los viquingos, lloñe de someter a la población nativa d'etnia ástur, fundiéronse con ellos y establecieron llazos de matrimoniu, ayuda y comerciu.
Consideróse que la fala de los pixuetos tenía unes característiques que la facíen estremase de la llingua del restu d'Asturies, inclusive de los mesmos vecinos de Cuideiru que nun se dediquen a la pesca, los caízos. Tou esto rellacionáu cola presencia de los viquingos en Cuideiru. El pixuetu o pixuatu, una variante del asturianu que solo se fala en Cuideiru. El pixuetu sí que paez incluyir términos que paecen venir de les mariñes bretones o franceses.