Wilkin Aquiles, campeón del mundu d'escanciáu en trés ocasiones xubióse al escenariu del conocíu programa «Got Talent», un show destináu a conocer dalgunos de los meyores talentos y onde l'escanciador trató d'ablucar tanto al xuráu como al públicu ellí presente. «Voi facer daqué que nunca se vio enGot Talentdicía Wilkin Aquiles momentos antes d'empezar la so actuación. Lo que menos esperaben los xuraos y el públicu de Got Talent, un concursu que tien la so versión en dellos de países, yera ver a un dominicanu nel escenariu con unes botelles de sidra y una escalera. Tanto ye asina que naide sabía nin albidraba en qué consistía la so actuación.
Ente'l xuráu atopábase a una famosa asturiana: Paula Echevarría, quien s'ablucó ya interesóse al ver les botelles de sidra sobre l'escenariu. Foi nesi momentu cuando Santi Millán confirmó que'l númberu del dominicanu consistía nuna prueba na que tenía qu'echar seis culinos de cien milillitros esactos, too ello «a güeyu», ensin nengún tipu d'ayuda.
Magar se llevó'l refugu del polémicu Risto Mejide, Paula Echevarría nun salía del so plasmu al comprobar que 5 de los 6 vasos teníen la midida esacta. Pero nun acabó'l númberu equí: Wilkin xubióse a 1,60 metros pa echar con altor y amosar la so perfeccionada técnica. Una manera más de dar a conocer el nuesu productu más famosu y consumíu.
