Tino Casal, Mafalda, Ana Ozores y Woody Allen caminen en secretu pela nueche uvieína, cuando duermen los vecinos y turistes, pa nun aferruñase y caltener la bona salú visual y física de les sos estatues nel centru de la capital asturiana. Alcordaron toos ellos, asina como'l restu d'estatues que revisten Uviéu, volver pela mañana a la so posición orixinal, pa nun alteriar el camín atariáu de los trabayadores o'l paséu placenteru de los visitantes.

Asina, Uviéu queda enllena d'arte cada nueche, de vida y cultura, como queda'l mar saláu peles mañanes o l'orbayu enantes de dormir. L'arte atópase en cada pasu per Uviéu, pero podemos destacar dellos espacios que podríen pasar desapercibíos.

Muséu de Belles Artes d'Asturies

La pinacoteca más importante d'Asturies nun ye ún d'esos llugares que queden fuera de les axendes culturales o escaecíos polos turistes, pero siempre ha destacase la so impresionante colección. Instaláu ente'l Palacio de Velarde, del sieglu XVIII, y la Casa d'Uviéu-Portal, construyida en 1669, el Muséu de Belles artes dedica los sos trés edificios colindantes a obres realizaes dende va más de 600 años. El muséu atesora una colección permanente de más de 15.000 obres, tomando importantes artistes españoles y asturianos como Goya, Nicanor Piñole, Sorolla o Carreño de Miranda y pintores internacionales como Angélica Kauffmann, Tiziano, El Greco o Rubens. Amás de la obra pictórica y la inmensa ufierta d'esposiciones temporales y actividaes como'l cine de branu al aire llibre, el Muséu de Belles artes d'Asturies ye en sí mesmu, gracies al so conxuntu palaciegu, un espaciu a visitar pa conocer l'arquitectura moderna española y asturiana. Tamién destaca na so colección una amplia gama d'escultures, fotografíes, pieces d'arte gráficu y la sección d'arte industrial, que cunta con artiluxos de fábriques como L'Asturiana o la Real Fábrica de Sargadelos.

Lata de Zinc, chigre cultural

Uviéu constitúi como ciudá un poliédricu alcuentru de cultures y manifestaciones artístiques, yá seya por tar en plenu centru d'Asturies, poles influencies del Arcu Atlánticu o pol calter creativu y social que dexa la so llarga historia y relación col restu de la Península Ibérica. Tou ello entemezse na Lata de Zinc, un reivindicativu y divertíu chigre cultural n'Otero. Dende la periferia urbana, la Lata de Zinc compónse de dos plantes: la primera ye un coloríu chigre veganu, que nun gocia d'una ufierta xigante pero relluma pola so diversidá, mientres que la planta inferior ye una sala de conciertos. Nel suétanu de la Lata de Zinc, l'espaciu más interesante del complexu, celébrense cada selmana eventos culturales autoxestionaos, xires d'artistes asturianos ya internacionales como Roy Sullivan, Mondra o Rey Toro, micros abiertos, conciertos de jazz, ballroom, xornaes artístiques, … Una ufierta inabarcable de cultura nueva y diversa que cunta con eventos de mayor caláu como'l Semando Fest, el Festival “A Usted le Gustará” o Punk Against Apartheid.

Xueves Folk en L’Esperteyu

L’Esperteyu lleva años siendo ún de los pubs más populares d'Uviéu, n'especial si busques una esperiencia más afayadiza y de tradición intercéltica. El chigre tien siempre un llume tenue y llariegu y la so decoración icónica, enllena de cartelos publicitarios antiguos, banderes d'Asturies, Bretaña o Irlanda, fotografíes del Festival Intercélticu de Lorient, da al llugar un pesu históricu, como si'l tiempu pasara mui rápido y se parara xusto ellí. Nesti viaxe temporal, cada xueves a les 21:00 L’Esperteyu amiesta pasáu y futuru al traviés de conciertos folk y de música tradicional. Espectadores y artistes comparten escena, mesa y sielles, lo qu'asegura una esperiencia cercana, d'esperimentación artística y musical tan interesante pa turistes y desconocedores de la cultura celta como a los sos aficionaos.