A mediu camín ente Lluanco y Xixón aguarda Candás, villa marinera y capital del conceyu de Carreño que s'escuende ente'l mar, los valles del sur del conceyu y los cantiles que dibuxen les sos sableres y paseos marítimos. Candás dexa al visitante caminar per una ciudá polifacética, interesante combinación d'altores, cais tropezoses y estreches, arquitectura modernista y una acandilante actividá mientres el branu, marcáu polos sos mercadinos, les sos populares xeladeríes y celebraciones como la Sardina.
La primer imaxe que recibimos al entrar na localidá ye una imponente torre frente al mar, divisiva pol so estilu y estraña por nun paecese al restu d'edificios candasinos. La so apariencia fuera de sitiu marca daqué positivo en Candás: hai muncho que ver nun espaciu pequeñu. Damos una repasada a trés de les sos principales encantos.
Faru de Candás
Esti faru encabeza'l cabu de San Antonio, imponente llomba qu'abraza a la ciudá y dexa ver Xixón y el Cabu Peñes na llonxanza. A lo cimero d'esti monte pue conocese esti centenariu faru d'uralita y piedra gris, de construcción rectangular y torre baxa, como si nun quixera llamar l'atención del pasiante. Al so llau, trés vieyos cañones reposen pa cuntar la historia d'esti interesante enclave pesqueru y defensivu: dende'l sieglu XVIII, Candás refugó ataques ingleses gracies al cabu de San Antonio, que caltién inda, sol faru, los restos d'un fuerte defensivu.
A escasos metros del faru podemos atopar tamién la Ermita de San Antonio, d'estilu renacentista popular y que data de 1615. Amás, el conxuntu del faru sirve de sede pa la Banda de Gaites de Candás, lo que podría dexar al visitante escuchar dalgunu de los sos ensayos, si la suerte lu acompaña.
Sablera de Rebolleres
Curiáu pola paré occidental del cabu de San Antonio, Candás regálanos otru esconderite natural, la sablera de Rebolleres, un semicírculu de sable y conglomeráu qu'asegura un bañu muncho más sele que'l restu de sableres de la localidá. Magar el so complicáu accesu, la sablera cunta con fontes y duches y con equipu de salvamentu marítimu. El so amenazante aspectu, predresu y montascosu, nun tien d'asustar al bañista, que va poder disfrutar nesta fotoxénica cala d'un remansu ideal pa folgar y disfrutar del mar Cantábricu.
Rebolleres supón la primer sablera de la sienda costera que conecta Lluanco con Candás y la so característica forma oxival torga la llegada de foles y corrientes peligroses a la vera, polo que pue convertise nuna bona candidata a acoyer el primer bañu de la ruta.
Teatru Prendes
Al sur de Candás, fuera de la redolada de les sableres, esti cine y teatru de mediaos del sieglu XX constitúi ún de los meyores exemplos n'Asturies del estilu modernu de los años 50 y 60. La so imponente cristalera y la so maciza estructura rectangular apurren al edificiu un atanante aspectu, bien distintu al restu de la ciudá. Sicasí, lo más interesante escuéndese nel so interior. De xestión pública, el Teatru Prendes sigue ufiertando una amplia y diversa ufierta cultural, teatral y cinematográfica.
Mientres la segunda quincena d'agostu, el Priendes acueye'l Salón de Teatru Costumbrista Asturianu de Candás dende 1991, ésitu de públicu y crítica dende entós con obres en castellán y asturianu. Amás, pel branu celébrense'l Festival de Cine d'Aventures y de la Mar al campu y el Festival Internacional de Títeres y de Teatru Familiar «El Rinconin de los Titeres». El primer sábadu de cada mes celébrase tamién el Ciclu de Cine Clásicu en Versión Orixinal.