Corniana prepárase pa convertise, un añu más, nel epicentru de la tradición salmonera cola celebración de la XXVI Feria del Salmón – Capenastur, que va tener llugar los díes 18 y 19 d’abril a veres del ríu Narcea. L’eventu, consideráu Fiesta d’Interés Turísticu Rexonal, va xuntar mientres tol fin de selmana actividaes culturales, gastronómiques, deportives y divulgatives alredor d’una de les especies más emblemátiques d’Asturies.
La programación va entamar el sábadu 18 a les 11:00 hores cola apertura oficial del recintu ferial. Namás media hora dempués, ente les 11:30 y les 12:30, va desenvolvese un taller de tiru de precisión con carabina organizáu pol Club Asturias Field Target. A les 12:00 hores va tener llugar una visita guiada al Monesteriu de San Salvador, unu de los principales referentes patrimoniales de la zona.
La mañana va siguir a les 12:30 con un taller y exhibición de cetrería a cargu de Falcons Galicia, siguíu a les 13:00 de la presentación oficial de la Copa Micra-Tierra 2026. A les 13:15, el protagonismu va recayer na divulgación científica cola ponencia “Garrapates: riesgu y prevención”, impartida pol especialista Alberto Espi, del SERIDA.
Yá pela tarde, a les 16:00 hores va celebrase una charla-coloquiu baxo’l títulu “El futuru de la pesca n’Asturies”, na que van participar representantes del sector pesqueru rexonal. A les 16:30 van volver les exhibiciones de cetrería, y a les 17:00 van retomase les visites guiaes al monesteriu. A esa mesma hora va tener llugar tamién una charla sobre’l futuru de la caza n’Asturies. La xornada del sábadu va concluyir con una propuesta gastronómica destacada: a les 19:00 hores, el cocineru y cazador David Montes va ufiertar un showcooking nel que va ellaborar platos de caza y pesca con degustación incluyida. El recintu ferial va zarrar les sos puertes a les 20:30 hores.
El domingu 19 d’abril va entamar igualmente a les 11:00 hores cola apertura del recintu y un programa continuu de talleres, exhibiciones y actividaes culturales. A les 12:00 hores va celebrase l’eventu central de la xornada matinal: un programa especial dedicáu a la subasta del Campanu d’Asturies, que va ser retransmitíu en direuto y que constitúi unu de los momentos más esperaos del fin de selmana. A lo llargo del día van asoceder actividaes como talleres de tiru de precisión, nueves exhibiciones de cetrería y visites guiaes al Monesteriu de San Salvador. A les 13:00 hores van entregase los galardones al Pescador y Cazador del Añu, reconociendo la trayectoria de figures destacaes del ámbitu cinegéticu y pesqueru.
El momentu culminante va llegar a les 13:15 hores cola primer tentativa de subasta pública del Campanu d’Asturies, el primer salmón capturáu na temporada. En casu de que l’exemplar seya pescáu más tarde, la subasta va treslladase a les 18:00 hores. Esti actu, organizáu pol Conceyu de Salas, xunta cada añu a numberosos participantes y curiosos, y simboliza l’entamu oficial de la campaña salmonera.
La programación va siguir mientres la tarde con nueves exhibiciones, talleres y actividaes culturales, amás d’una segunda subasta pública si fuera necesario. A les 16:00 hores va celebrase la Gala de Pesca 2026, organizada pola Federación de Pesca y Casting del Principáu. La feria va incluyir tamién concursos, como’l de fotografía o’l torneu virtual, que los sos premios van entregase a partir de les 18:30 hores. El zarru oficial del recintu ferial ta previstu pa les 19:00 hores, poniendo fin a dos intenses xornaes que combinen tradición, ocio y promoción del entornu natural.
Amás del programa principal, mientres tol fin de selmana los visitantes van poder esfrutar d’actividaes paraleles como esposiciones de trofeos de caza, simuladores de tiru virtual, cursos de pesca y lance, talleres infantiles, mercáu agroalimentariu y xornaes gastronómiques nos restoranes del conceyu de Salas.
