A les afueres de Cuideiru, na población d'El Pito, atópase una edificación que representa los valores de la filantropía de finales del sieglu XIX y el sieglu XX. Trátase de la Quinta de los Selgas y convidámosvos a visitala.
La Quinta de Selgas ye un conxuntu de palaciu y finca axardinada que se construyó ente 1880 y 1895 por iniciativa de los hermanos Ezequiel y Fortunato de Selgas Albuerne: el primeru, empresariu d'ésitu en Madrid, punxo los medios económicos pa realizar el proyectu, mientres que'l segundu, historiador y aficionáu al Arte, ellaboró'l trazáu de diseñu historicista. La casona caltien casi intacta la so decoración orixinal, y alluga pintures de grandes artistes como Goya, El Greco, Luca Giordano, Corrado Giaquinto y Vicente Carducho; tollo acompañáu d'un variáu mostrariu de muebles, testiles, oxetos d'orfebrería y vidriu, abanicos y porzolana europea y oriental. Un pabellón vecín rehabilitáu nun fai enforma esibe una colección de tapices y acueye esposiciones temporales. Los xardinos de 9 hectárees cúntense ente los más relevantes d'España. Ye conocíu popularmente como 'l Versalles asturianu.
Si tas interesáu en visitalo, ties que tar sollerte a los sos comunicaos, yá que la visita nun ta permitida mientres tol añu y la reserva ye necesaria. Xeneralmente, suel tar abiertu nos meses de branu, cuando'l conceyu cunta con una mayor arribación de turistes.