La ruta de la Seimeira, bien corta (namás tien 6 kilómetros, que se percuerren en namás dos hores) y bien cenciella (puede facese hasta con neños) sitúase na comarca de Os Ozcos. Ye una ruta llinial qu’entama nel área recreativa de Pumares y llega hasta la cascada de a Seimeira de Murias, un espectáculu de la naturaleza onde l’agua cai dende una altura d’hasta 30 metros.
Como dicíemos, la ruta principia nel área recreativa de Pumares y sigue’l calce del ríu Agüeira, travesando nos primeros 200 metros el propiu pueblu de Pumares, de tradición ferreira y arquitectura tradicional. Dempués de kilómetru y mediu, vamos llegar a una bifurcación, onde se toma’l camín de la derecha, pa llegar a Ancadeira, un pueblu abandonáu.
Dende equí, vamos tomar un camín que s’abre a la nuesa derecha, pa tomar rumbu a la cascada, pasando pel Valle del Desterrado, que s’alcuentra a 2,8 km del aniciu de la ruta. Ye nesti puntu onde ta’l camín directu a la cascada, xusto a la derecha y namás a 500 metros de la fin del camín, onde vamos poder esfrutar d’esti monumentu natural.
Pa volver hai dos opciones: o baxar pel mesmu sitiu hasta llegar a Pumares o facer una visita al pueblu de Busqueimado, que ta siguiendo’l camín qu’hai a la derecha nel kilómetru 3,10 de la ruta. Dempués d’esto, la ruta remata nel mesmu sitiu que s’entamó.