Asturies, una zona rica en tradiciones y cultura, destácase poles sos festividaes úniques y enraigonaes. Una de les celebraciones más esperaes y significatives nesta tierra ye la tradición del aguilandu. Estos festexos, que tienen fondos raigaños culturales, reflexen la identidá y l'espíritu festivu de los asturianos.
«Estas puertas son de pino que aquí vive un gran vecino, que nos dará de aguinaldo libra y media de tocino. Estas puertas son de hierro que aquí vive un caballero, que nos dará el aguinaldo para el año nuevo». Esta ye una de los cantares que d'antiguo cantaben los mozos nos pueblos asturianos diendo de casa en casa pa pidir l'aguilandu. Según el pueblu, podía ser na víespora d'añu nuevu, el primer día del añu o en Reis.
Los oríxenes del aguilandu
Na publicación Fiestas de Asturias esplícase qu'esiste una «fonda coincidencia» d'estes celebraciones populares colos ciclos agrícoles y llabradores, «que lleven a pensar nun ancestral posu». Na mesma publicación esplícase que Navidá, San Silvestre y Reis yeren los trés díes preferíos polos mozos asturianos pa facer estes «gracioses» actuaciones «tan chocantes como los nomes que recibíen según los llugares». Y citen, amás de los sidros y zamarrones de L.lena, a los sidros en Siero y Nava, al guirria en Ponga, a los bardancos en Casu, a los zaparrastros n'Ayer y a los aguilanderos en Quirós.
Fausto Vigil atribuyíalu a los autos sacramentales representaos a partir de la Edá Media y que, al ser ritos paganos aceptaos pola Ilesia, acabaron escenificándose nes cais de los pueblos. Juan Uría Ríu, nun artículu sobre l'orixe de los sidros, consideraba qu'estes tradiciones teníen d'interpretase como derivación d'otres precedentes d'orixe paganu, anteriores inclusive a la dominación romana, «de suerte que dalgunos de los elementos de los sidros apaecen como de clara xénesis totémica» y que la Ilesia lo que fixo foi aprovechase d'elles, como se recueye en Cultura oficial e ideología en la Asturias franquista: el IDEA (Jorge Uría, 1984).
D'esta manera, anguaño caltiénense delles celebraciones n'Asturies:
- Aguilandeiros de San Xuan (Grau)
- Los Guilandeiros (Tinéu)
- Os Reises del Valledor (Ayande)
- Domingu’l Gordu (Rozaes, Villaviciosa)
- Sidros y comedies (Valdesoto)
- Mazcaritos d’Uviéu (Uviéu)
- Los Zamarrones (L.lena)