La pintura y la hestoria del arte foi históricamente un llugar onde los nomes d'homes yera lo común, pero, anque menos conocíes, tamién hubo muyeres. Ye'l casu que güei vos presentamos: Julia Alcayde Montoya.
Julia Alcayde Montoya foi una pintora asturiana que nació en Xixón el 22 de mayu de 1855, considerada como una de les meyores pintores españoles de finales del sieglu XIX y empiezos del sieglu XX, que destacó polos sos bodegones, floreros y escenes de caza, anque tamién trabayó'l paisaxe y la semeya. Ye una de les primeres artistes asturianes de relieve y una de les máximes representantes del bodegón burgués.
Nació en Xixón, pero siendo entá neña foi treslladada a vivir a Madrid, anque nun perdió'l contactu cola so tierra natal, tornando a Asturies siempres que-y foi posible. La so formación artística empezó na capital, na Escuela d'Artes y Oficios de Madrid que dirixía'l profesor Manuel Ramírez. Llueu destacó pola so capacidá p'afigurar emociones con llápices y pincel al traviés de distintes técniques como l'oliu, l'acuarela o'l pastel. Coles mesmes que desenvolvía la so actividá artística caltuvo una intensa relación con destacaes figures de la política y la cultura, ente los que destacaben el escritores Benito Pérez Galdós y Emilia Pardo Bazán. La gran cantidá de galardones qu'atropó a lo llargo de la so trayectoria fae que, entá güei, seya l'artista asturiana que más medayes llogró nes Esposiciones Nacionales de Belles Artes.
Julia Alcayde Montoya ye unu de los meyores casos d'invisibilización femenina, yá que a pesar de ser una de les máximes esponentes del arte d'Asturies, nun tien malpenes reconocencia.