Mio güela Syra yera una güela ensin edá. La so partida nacimientu perdióse na Guerra Civil y esto aprovechólo ella pa quitase dalgún añu cuando volvió a arreglar los sos documentos. Nun se m’olvida cuando-y pregunté cuántos años tenía y nos castigó a min y al mio primu. Preguntar eso yera de mui mala educación.
Nacida en Bo (Ayer) yera fía d’un mineru que morrió por una esplosión de grisú, y de los trés hermanos tocó-y a ella dir pal Orfanatu Mineru d’Uviéu y ellí se crió. Cuando tenía 9 años, hebo un tirotéu nel orfanatu y ella, cola curiosidá y la inocencia d’una cría foi a asomase a una ventana pa ver qué pasaba y travesó-y l’hombru una bala. Sangraba tantísimo que quedó inconsciente y les demás críes diéronla por muerta y ellí la dexaron envuelta nuna manta. Pero al pasar un ratu, un soldáu dióse cuenta que siguía viva y lleváronla al hospital, onde la salvaron. Aquello pienso que yera una seña de les inmenses ganes de vivir que tenía, y que bien demostró dempués.
Enantes de casase y afincase en Les Arriondes vivía n’Uviéu, onde trabayaba como secretaria de la Xefatura Provincial de Mines. D’aquella diba col Real Uviéu a tolos partidos, siempre-y gustó correr muncho. Dempués de criar a cinco fíos fueron frecuentes les escursiones pel monte col mio güelu Alberto, les escapaes cola coral, y colos demás conxuntos nos que taba metida, Fe d’estp danlo les semeyes, qu’hai como empapelar toa Asturies, porque ella desde bien xoven diba a tolos llaos cola máquina de fotos y dexaba costancia de toles sos andadures y de la xente que l’arrodiaba. ¡Y lo bien que posaba! A presumida yera difícil ganala.
Nel añu 2010 diéron-y’l Premiu Fayuela de Les Arriondes por “dedicar una vida a los demás”, reconociendo’l so llabor na vida social y cultural del conceyu: foi una de les fundadores de la Coral Cima de Parres, pionera nel asociacionismu d’ames de casa, presidenta de l’asociación de donantes de sangre y ayudaba tamién na ilesia. Una cabecina inquieta y con ganes siempres de deprender y de ver más.
Echo de menos les sos hestories (tuvo una memoria ablucante hasta l’últimu día), la so risa y bon humor y hasta’l colacaao con zucre que me preparaba la mañana de Les Piragües, qu’anque me repunaba tan dulce, sentábame lo bien que sienta tolo que te da’l ciñu d’una güela.