Dende va yá más de 65 años, cuando llega l'últimu domingu de xunetu, celébrase la Vaqueirada na Braña de Aristébanu, ente los conceyos de Valdés y Tinéu. Esti domingu 27, vamos poder esfrutar d'unu de los eventos más emblemáticos del occidente asturianu que lleva reconocida como “Fiesta d'interés turísticu rexonal” dende 1980.
Los vaqueiros d'alzada constitúin dende va sieglos un pueblu con una cultura ancestral mui propia. Dedicábense a la ganadería treshumante pa que'l so ganáu aprovechara les camperes a lo llargo de les estaciones en distintes zones. Pel branu, llevaben los sos rebaños al monte, pasando les nueches nes brañes, pequeños y característicos núcleos de cabanes de piedra asitiaes en zones altes.
Pal iviernu, tornaben de vuelta a los sos pueblos. Esta forma de vida semi nomádica contribuyó a que desenvolvieren una identidá propia, marcada por costume, música, llinguaxe y ritos diferenciales. A esto tamién se-y añede la marxinación social que sufrieron per parte de los xaldos (nome col que se referíen a la población rural sedentaria) que-yos consideraben xentes axataes, probes y pocuocristianes y tamién discriminación institucional, torgando casar con aldeanos o sentase nos primeros bancos de les ilesies.
La Vaqueirada 2025
Al ser un grupu social tan estremáu y con un folclore tan propiu, los vaqueiros solíen emparentarse ente ellos, perpetuando asina unes costumes que llegaron hasta los nuesos díes. Pa caltener les tradiciones, mientres la Vaqueirada tien llugar unu de los momentos más simbólicos y esperaos: una boda tradicional al estilu vaqueiru, na que dos persones se casen de verdá siguiendo'l ritu antiguu. La ceremonia celébrase al aire llibre, en plena naturaleza, como se facía antaño, y reproduz fielmente los elementos esenciales del enllaz. Los novios ya invitaos lleguen en carros engalanaos, precedíos pola dote nupcial, que va nun carru tiráu por vaques o gües, símbolu del trabayu y la vida doméstica.
Los asistentes llucen la vestimienta tradicional vaqueira, que varia según el conceyu. Pa les muyeres suel incluyir faldes llargues y pañuelos, y pa los homes camises, chalecos y sombreros d'ala, tou con texíos resistentes y detalles bordaos a mano. Mientres la xornada recréense dances ancestrales como la danza prima o'l xiringüelu, acompañaes de música en directu interpretada con preseos tradicionales como la gaita asturiana, el tambor, el pandeiru cuadráu o la flauta trevesera de madera. Estes melodíes, tresmitíes de xeneración en xeneración, remembren la vida nel monte y l'espíritu llibre de los vaqueiros.
Tres la ceremonia, l'ambiente conviértese nuna auténtica celebración vaqueira, con una llacuada tradicional al aire llibre. Na comida de la Vaqueirada nun falten platos emblemáticos: el choscu de Tinéu, tosquilar vaqueira, les pulientas, el gurupu y les nates vaqueires. Los frixuelos vaqueiros y la borona preñá tamién son frecuentes; toos ellos formes d'alimentase con enerxía y caloríes abondes p'aguantar la vida trashumante. Acompáñense xeneralmente de sidra y vinu local.
Asistir a la Vaqueirada ye averase a una forma de vida que marcó fondamente la hestoria del occidente asturianu. Ye entender dende dientro lo que significa pertenecer a una comunidá que fixo del monte'l so llar y de l'alzada, el so camín. Pa quien quieran conocer Asturies dende'l so raigañu, poques esperiencies resulten tan auténtiques, conmovedores y enriquecedoras como esta.
