Dende avientu de 2024, la Cultura Sidrera Asturiana forma parte del Patrimoniu Cultural Inmaterial de la Humanidá declaráu pola UNESCO. Esta cultura ye una manera de vivir, de celebrar y d'entender la relación ente les persones, la tierra y el tiempu. La sidra, n'Asturies, xune xeneraciones, da sentíu a los alcuentros sociales, marca les estaciones del añu col floriamientu del pumar y el soníu del escanciáu, y conviértese en símbolu d'identidá y arguyu colectivu. Y too eso pue sentise en Nava.
Como cada añu, la celebración de la bébora más famosa d’Asturies vuelve a Nava, col XLVIII Festival de la Sidra, qu’esti añu va celebrase del 11 al 13 de xunetu. Llega, amás, depués que la villa asturiana entrara nel mes d’abril na Rede Europea de Ciudades de la Sidra, un pasu más nel oxetivu qu’esta fiesta seya considerada d’Interés Turísticu Internacional que va acompañáu d’un actu en Bilbo nel que se va espichar una pipa de sidra.
La programación del Festival de la Sidra de Nava 2025
La selmana empieza'l martes 8 de xunetu, cola primer preselección del concursu a la meyor sidra natural ellaborao n’Asturies. Nel Llagar de prebar y aldericar, y nel Muséu de la Sidra inaugúrase la esposición coles obres participantes nel concursu del cartelu anunciador. El miércoles 9, l'atención diríxese nuevamente al Llagar de Sorribes, esta vegada pa celebrar la final del concursu de sidra de nueva espresión y derivaos de la mazana, una categoría qu’amuesa cómo tradición ya innovación pueden convivir nuna mesma botella.
El xueves 10, la emoción crez con una segunda ronda de preselección nel concursu principal, siguida pol teatru na cai, onde la compañía ACAR Teatru del Mundu presenta “Manolito va al espaciu” na Plaza Manuel Uría, arrancando rises a pequeños y grandes. A les 20:00, el SIDRAFORUM nel muséu ufierta una mirada ecolóxica y cultural con una charra sobre polinizadores, páxaros y otres especies clave na cultura sidrera. La nueche pieslla cola música tradicional de los Cancios de Chigre en sidreríes llocales.
El vienres 11 entama cola semifinal del concursu de sidra natural y sigue col eventu SidrArte, una salida artística onde dibuxantes urbanos retraten l'alma del festival. La plaza Manuel Uría va enllenase de color, arte y un ambiente creativu que sigue cola actuación de “La Parranda de Teror”, dende Gran Canaria. La xornada remata cola música de la Orquesta Acordes y DJ Pika.
El sábadu 12 ye'l gran día. Dende ceo, les cais de Nava van enllenase. Los pasucais con ‘Los Gascones’ marquen l'entamu d'una xornada intensa. Hai degustaciones de sidra y productos llocales na Plaza Manuel Uría, cola participación de llagares de tola contorna y el llagar ganador de la edición anterior. A les 12:00 celébrase la esperada Gran Final del concursu principal. Siguen l’actu d'entrega de la Etiqueta más Guapina, l'emotivu Bautizu Sidreru pa los más pequeños y l’hermanamientu simbólicu de tola sidra asturiano.
Pela tarde, ufiértase una preba nel muséu con Juan Luis García, siguida del coloríu desfile de los Culetinos —neños ente 5 y 11 años—, y más música nes cais cola charanga ‘La Última y marchamos’. A les 20:00, dende'l balcón de la Casa Conceyu, apúrrense los premios, pronúnciase'l pregón —de la periodista Marta Reyero— y entónase l'himnu d'Asturies. Un gran barrenazu da entamu a la Ruta de la Sidra peles cais de Nava. Yá entrada la nueche, los conciertos de ‘Grupo Assia’ y ‘Dani Parrondo – The Goat’ enllenen de ritmu la villa.
El domingu 13, tres el concursu internacional d'escanciadores, el Tren Sidreru percuerre diversos llagares de Nava en visites guiaes, mientres les cais anímense con pasucais y la gran Comida na Cai, una llacuada colectiva amenizada con música. Pela tarde, la Ilesia San Bartolomé acueye'l VII Alcuentru Coral Villa de la Sidra, con coros de toa Asturies, y la nueche despídese coles actuaciones de ‘La Misión’ y ‘Nueva Banda’. A lo último, el llunes 14, la reciella toma’l protagonismu nel Festival Infantil con hinchables, música, el Mago Loco y fiesta de la espluma na Plaza Manuel Uría.
A lo llargo de tola fin de selmana’l recintu ferial Festilandia, nel aparcamientu del Grandiella, ufierta atracciones pa toles edaes, zarrando un festival que nun ye solo un homenaxe a la sidra, sinón a tola cultura asturiana que lo arrodia. Ye por eso que nun puedes faltar a la gran celebración de la sidra nel so Festival, en Nava, los díes 11, 12 y 13 de xunetu. Si pierdes esta fiesta, vas arrepentite de xuru pa tola vida.