Cola llegada de la primavera empiecen lo qu'en Asturies conocemos como «Les espiches». L'orixe d'esta tradición surde del momentu de prebar la sidra tres los meses de fermentadura. Los dueños de los llagares convidaben a los vecinos pa prebar la sidra y col tiempu esti actu foi enraigonándose cada vez más a la nuesa cultura. Per otra parte el términu «espicha» provien del palu que s'usaba p'abrir les pipes de sidra cuando yá taba llista pa consumir, que recibe esti nome.
Esta costume asturiana namás dura alredor de dos meses, d'aprosimao'l 19 de marzu a principios de mayu. El fechu de qu'empiece nesti períodu nun ye casualidá, sinón que ye la dómina na que s'abren o espichen los toneles de sidra tres los meses de fermentadura. Si ta fuera d'esti períodu nun puede considerase espicha.
Sobre'l llugar, nos postreros años esisten dos tipos d'espiches:
- En primer llugar ta la espicha tradicional. Esta suel entamar en recintos particulares que cunten con llagar, de normal en pueblos. Nestos recintos los propietarios acondicionen una zona, de normal un xardín, con meses y sielles pa que la xente vaya a xintar.
- De segundes, tán les espiches qu'últimamente dellos restoranes tán celebrando. Estes son de calter más formal.
En cuanto al menú, nun hai primer platu nin segundu, sinón una amplia variedá d'alimentos como: chorizu, tortiella, llacón, embutíu, empanada, quesu, pataques, güevos cocíos, etc. Y por supuestu de beber sidra (mesma del llagar onde vaigamos), anque siempres se dispón d'otru tipu de bébores.
Poro, llamamos espicha a la xunta, tanto con familiares como con amigos, que cunta coles anteriores característiques mentaes. Una espicha nun ye una comida o un llugar, sinón una tradición.
Conoz otres tradiciones asturianes como'l amagüestu, equí en VerAsturies.