Cada selmana vas poder atopar en VerAsturies.com les recetes llambiones de la escritora Beatriz Rato.
Ingredientes:
¼ de kilo d’arroz, dos llitros de llechi, ¼ de kilo d’azucre, 50 gramos de mantega, un palu de canela, un cachu de corteya de llimón, vainilla, una cuyaradina d’anís, una yema de güevu, canela molío, un plizcu de sal.
Ye importante que, anque varien les cantidaes de los ingredientes según les persones que van comer, hai de caltener la proporción y la cantidá d’azucre tien que ser la mesma que la d’arroz.
Procesu:
Cubrir l’arroz con agua y echar tol azucre esceptu una cuyarada sopera que s’acuta pal final. Añidir la mantega, l’anís, la vainilla, la corteya de llimón y el palu de canela atáu con un filu pa que nun rompa.
Ferver la miesta hasta que se vaporie l’agua y axuntar gotu a gotu la llechi que tien que tar templao. Nun tien de parar el fervor y hai que revolvelo ensin aparar pa que nun s’apegue. En chando tola llechi, siguir la coción pa que engorde a gustu de caún.
Retirar del fueu y, en enfrescando un pocoñín, axuntar la yema al empar que revolvemos enérxicamente pa mecelo dafechu.
Sacalo pa una fonte y dexalo enfrescar bien. Cola miesta del azucre separtao anantes y la canela molío, cubrir l’arroz y turrialo con un quemador elléctricu d’azucre.