Samartín de Lluiña va volver convertise nel epicentru de la cultura vaqueira los díes 1 y 2 d'agostu cola celebración del XXIV Mercáu Vaqueiru, una cita declarada Fiesta d'Interés Turísticu d'Asturies que combina tradición, música, artesanía, gastronomía y actividaes pa tolos públicos.

El mercáu va abrir les sos puertes'l sábadu 1 d'agostu a les 12:00 hores cola inauguración oficial, que va correr al cargu de Carolina Castro Fernández, reconocida col Premiu Muyer Rural 2025. A partir d'esi momentu, el programa va ofrecer una xornada cargada d'actividaes venceyaes al patrimoniu cultural vaqueiru

Pela tarde, a les 16:00 hores, el Centru Mario Folgueras va acoyer el taller interactivu «Mitos de barru», un proyectu de creación de seres mitolóxicos asturianos. Una hora más tarde van celebrase xuegos tradicionales asturianos cola participación de 6 Conceyos, y dende les 19:00 hores el protagonismu va ser pa la música y el baille, cola actuación del taller de baille y pandereta de Muyeres por Grau, siguida d'un conciertu del grupu Leirana.

La programación va siguir el domingu 2 d'agostu dende primer hora cola XI Ruta Vaqueira, entamada pol grupu de montaña y senderismu La Chiruca, qu'inclúi una charla del historiador y vecín d'Umayor Raúl Alonso sobre los vaqueiros d'alzada. El mercáu va reabrise a les 12:00 hores, y media hora depués ta prevista la llegada d'una concentración de Seat 600 Asturies.

Les actuaciones musicales y folclóriques van volver ocupar la tarde. A les 17:00 hores actua ZigZag Danza nel Centru Mario Folgueras; a les 18:00 hores va ser la vez de les Pandereteres de Somiedu, y el piesllu va ponelu Alba Menéndez cola actividá «Baila y canta con nós», prevista pa les 19:30 hores.

Amás del programa d'actividaes, el Mercáu Vaqueiru va cuntar mientres tol fin de selmana con exhibición d'artesanos, exhibición de gües, hinchables pa la reciella, un chigre al cargu de la comisión y una amplia ufierta gastronómica con productos tradicionales como los tortos y los frixuelos.