La Ribera ye pequeñu n'estensión pero grande en personalidá. La so capital, Soto Ribera, ocupa con cencellez un valle onde s'abracen los ríos Nalón y Caudal, chiscáu d'horros, cases campesines y elegantes casones qu'aguanten al pasu del tiempu. Con apenes 22 km², ye'l cuartu conceyu más compactu d'Asturies, pero eso nun impide que puxa con enerxía: asociaciones culturales, coros, gaites, equipos deportivos y una escuela de piragüismu moldien la so identidá. Y nesti conceyu puedes facer munches coses, como estes:
Güeñu
Si hai un pueblu asturianu que merez ser nomáu como exemplu de caltenimientu de les raíces d'una localidá, esi ye Güeñu. Perteneciente a la parroquia de Ferreros al norte del Conceyu de La Ribera, nuna de les vegues, serpentiada pel ríu Nalón, mas guapes d'Asturies. Con aprosimao 130 habitantes, tien la peculiaridá de ser el pueblu d'Asturies con un mayor númberu d'horros, mediu centenar, dalgunos d'ellos centenarios.
Dende'l Conceyu de La Ribera apostóse va unos años pola recuperación d'ún de los principales símbolos d'esta rexón: l'horru. Dende entós el mediu centenar d'horros y paneres d'esti pueblu, asina como'l Paséu de los Horros y el Centru d'interpretación del Horru asitió a Güeñu en primer llinia del patrimoniu etnográficu.
Centro d'Interpretación del Horru
El Centru d'interpretación del Horru ye'l primer muséu dedicáu a esta típica construcción asturiana. El so oxetivu ye esplicar los distintos modelos d'horros, n'especial los asturianos incidiendo na so diversa tipoloxía decorativa y esplicando les partes del horru y la so utilidá, dende los pegollos hasta'l cantapaxarinos, ensin escaecer les tolondras, etc. L'edificiu ye complementu de la Ruta interpretada, qu'inclúi la señalización de los 47 horros de Güeñu. Diversos paneles espliquen el percorríu d'una forma clara y esquemática.
Castiellu de Doña Urraca
Caltiénense restos d'un muriu, sobresaliendo la gran puerta d'arcu de mediu puntu constituyíu por grandes doveles bien llabraes (piedres tallaes en forma de cuña). El castiellu de Soto o de Doña Urraca, en Soto Rei, ye la construcción de mayor antigüedá nel conceyu de La Ribera. Trátase d'un castiellu de la dómina medieval que, magar tar en ruines, ye ún de los referentes de la so arquitectura popular y civil.
Apenes queden elementos pa conocer con esactitú lo que foi esta casa cercada, perteneciente a dalguna de les families nobles de la vera del Nalón. A lo llargo de los años, los valtamientos y l'usu de los componentes de mampostería nes viviendes próximes, apenes dexaron de pies el muriu de la cara norte. Nél repara la composición de sillareyu de caliar y arenisca, delles ventanes adinteladas recercadas de sillería de caliar, una ventanina d'arcu de mediu puntu y especialmente, la puerta d'arcu de mediu puntu con doveles llabraes.
