El Llagu Ubales, asitiáu a 1.690 metros d'altitú na fastera norte del picu Cascayón, consolídase como ún de los enclaves naturales más singulares del Parque Natural y Reserva de la Biosfera de Redes. D'orixe glaciar y arrodiáu por un paisaxe d'altu monte, esti espaciu ufierta a los senderistes una esperiencia única ente cumes, viesques y restos del modeláu glaciar.

El llagu, reteníu por una morrena de circu glaciar, forma parte d'un conxuntu de llagunes d'orixe similar nel Cordal Cantábricu, xuntu al Llagu Ausente, el Llagu Isoba y la Llaguna Negra. El so valor paisaxísticu y xeolóxicu conviértelu nún de los destinos más emblemáticos pa los amantes de la naturaleza y el senderismu.

Amás del so induldable valor paisaxísticu, el Llagu Ubales constitúi un importante enclave ecolóxicu d'alta montaña. Les sos agües, alimentaes principalmente pol destemple y les precipitaciones, alluguen comunidaes de flora y fauna adaptaes a les dures condiciones d'esta redolada. El llagu y la so redolada formen parte d'un ecosistema de gran fraxilidá, polo que s'encamienta a los visitantes permanecer nos senderos señalizaos, evitar dexar borrafes y respetar la tranquilidá del espaciu pa contribuyir al caltenimientu d'ún de los rincones más valiosos del Parque Natural y Reserva de la Biosfera de Redes.

Cómo aportar al Llagu Ubales

Esisten delles opciones pa llegar hasta'l Llagu Ubales. Dende'l conceyu de Casu, l'ascensión pue empecipiase en localidaes como Caliao, La Felguerina, La Infiesta o Bezanes, siguiendo la Ruta de Los Arrudos (PR-AS 61), un percorríu esixente que traviesa dalgunos de les paraxes más representatives del parque.

Sicasí, l'accesu más cómodu parte de la rodiada del Puertu de San Isidro, siguiendo'l Camín de Wamba (PR--Y 46). L'itinerariu conduz hasta la Collada Acebal, onde un abellugu de montaña sirve de referencia enantes d'encarar l'últimu tramu escontra'l llagu. Dende esti puntu, un senderu bordia la fastera oriental del Cascayón hasta algamar una pequeña collada dende'l que s'abre una magnífica panorámica sobre'l fayedal de Redes. Darréu, un descensu d'aprosimao media hora dexa llegar a la vera del llagu.

Mientres el percorríu, los escursionistes esfruten d'una espectacular redolada d'alta montaña con vistes a cumes como Peña del Vientu, La Rapaína, Picu Valmartín, Picu Torres o'l mesmu Cascayón, amás de contemplar la Viesca de Redes y la Vega de Brañagallones, dos de los paisaxes más representativos del espaciu protexíu.